مەملەكەت باسشىسى قاسىم-جومارت توقاەۆتىڭ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىعىن ىسكە اسىرۋ ماقساتىندا تۇركىستان وبلىستىق «فاراب» امبەباپ عىلىمي كىتاپحاناسىندا «كىتاپپەن كەمەلدەنگەن ۇلت» اتتى دوڭگەلەك ۇستەل ءوتتى.
«كىتاپ وقيتىن ۇلت» جوباسى اياسىندا وتكەن باسقوسۋدا العاشقى بولىپ ءسوز العان تۇركىستان وبلىسى اكىمىنىڭ ورىنباسارى ەرتاي التاەۆ وڭىردە اتالعان جوبا اياسىندا اتقارىلىپ جاتقان جۇمىستار تۋرالى باياندادى. كەزدەسۋدە قازاقستان جازۋشىلار وداعىنىڭ مۇشەسى، «دارىن» مەملەكەتتىك جاستار سىيلىعىنىڭ جانە «الاش» ادەبي سىيلىعىنىڭ يەگەرى قالقامان سارين كىتاپتىڭ ادام دۇنيەتانىمىن كەڭەيتۋدەگى، ۇلتتىق قۇندىلىقتاردى ۇرپاق ساناسىنا سىڭىرۋدەگى ماڭىزى تۋرالى وي قوزعادى. سونداي-اق، جاستاردىڭ ادەبيەتكە قىزىعۋشىلىعىن ارتتىرۋ، وقىرمان تالعامىن قالىپتاستىرۋ جانە كىتاپ وقۋدى كۇندەلىكتى داعدىعا اينالدىرۋ ماسەلەلەرىنە توقتالدى.
ءىس-شاراعا قوعام قايراتكەرلەرى، عالىمدار، زيالى قاۋىم وكىلدەرى، كىتاپحانا باسشىلارى مەن ستۋدەنتتەر قاتىستى. دوڭگەلەك ۇستەلدى قازاقستان جازۋشىلار وداعىنىڭ تۇركىستان وبلىستىق فيليالىنىڭ توراعاسى، اقىن ايدار سەيدازىم جۇرگىزىپ وتىردى.
اشىق پىكىر الماسۋ بارىسىندا زيالى قاۋىم وكىلدەرى وقۋ مادەنيەتىن دامىتۋ، قالا مەن اۋىل جاستارىن ورتاق رۋحاني قۇندىلىقتار توڭىرەگىنە بىرىكتىرۋ جانە زەردەلى ۇرپاق تاربيەلەۋ جايىندا پىكىرلەرىن ءبىلدىردى. تۇركىستان وبلىستىق «فاراب» امبەباپ عىلىمي كىتاپحاناسىنىڭ ديرەكتورى جانات شارداربەكوۆا «كىتاپ وقيتىن ۇلت» جوباسىنىڭ ۇلتتىڭ زياتكەرلىك الەۋەتىن ارتتىرۋداعى ماڭىزى تۋرالى مازمۇندى وي قوزعادى. كىتاپ وقۋدى كۇندەلىكتى ءومىر سالتىنا اينالدىرۋ، جاستاردىڭ سانالى تاڭداۋ جاساپ، تەرەڭ ويلاۋىنا جول اشۋ – جوبانىڭ باستى مۇراتى ەكەنىن اتاپ ءوتتى. ءار بۋىننىڭ ويىن توعىستىرعان كەزدەسۋ - كىتاپقا قۇرمەتتى ارتتىرىپ، وقىرمان قالىپتاستىرۋعا قوعام بولىپ اتسالىسۋدىڭ ماڭىزىن ايقىندادى.
