مەملەكەت باسشىسى قاسىم-جومارت توقاەۆتىڭ وڭىرلەردە ينفراقۇرىلىمدى جاقسارتۋ، ءوندىرىس ورىندارىن اشۋ جونىندە تاپسىرما بەرگەن بولاتىن. وسى باعىتتا تۇركىستان وبلىسىندا اۋقىمدى جۇمىس اتقارىلىپ كەلەدى.
رەسپۋبليكا كۇنىنە وراي تۇركىستان وبلىسىندا الەۋمەتتىك ينفراقۇرىلىمدى دامىتۋعا جانە ءوڭىردىڭ وندىرىستىك الەۋەتىن ارتتىرۋعا باعىتتالعان بىرقاتار نىسان اشىلىپ، پايدالانۋعا بەرىلدى. جوبالار تۇرعىن ءۇي، دەنساۋلىق ساقتاۋ، مادەنيەت، سپورت، ونەركاسىپ جانە اۋىل شارۋاشىلىعى سالالارىن قامتيدى.
ۇلتتىق مەرەكە قارساڭىندا وبلىستا جالپى قۇنى 60 ملرد تەڭگەگە جۋىق نىسانداردى ىسكە قوسۋ جوسپارلانعان. ونىڭ ىشىندە 22,3 ملرد تەڭگەدەن استامى بيۋدجەتتىك ينۆەستيتسيالار ەسەبىنەن، 35,6 ملرد تەڭگەدەن استامى جەكە ينۆەستيتسيالار ەسەبىنەن جۇزەگە اسىرىلدى. جوبالار اياسىندا بارلىعى 648 ادامدى جۇمىسپەن قامتۋ كوزدەلگەن. ولاردىڭ بىرقاتارىنا وبلىس اكىمى نۇرالحان كوشەروۆ ارنايى قاتىسىپ، تۇرعىنداردى قۇتتىقتادى.
الەۋمەتتىك ينفراقۇرىلىمعا باسىمدىق بەرىلگەن. تۇركىستان قالاسىندا كەزەكتە تۇرعان ازاماتتارعا ارنالعان 7 قاباتتى 14 تۇرعىن ءۇيدىڭ پاتەرلەرى تابىستالدى. سارىاعاش اۋدانىندا دارىگەرلىك امبۋلاتوريالار مەن فەلدشەرلىك-اكۋشەرلىك پۋنكت، بىرنەشە اۋداندا مادەنيەت ۇيلەرى، كىتاپحانالار جانە سپورت كەشەندەرى اشىلدى. سونىمەن قاتار سارىاعاش قالاسىنداعى ورتالىق ستاديون قايتا جاڭعىرتۋدان ءوتىپ، پايدالانۋعا بەرىلدى. اۋىلدىق ەلدى مەكەندەردە تابيعي گازبەن قامتۋ جۇمىستارى جۇرگىزىلدى.
جەكە ينۆەستيتسيالار ەسەبىنەن جاڭا ءوندىرىس ورىندارى ىسكە قوسىلۋدا. ورداباسى اۋدانىندا ءىرى قارا مال سۇيەگىنەن ماي جانە جەلاتين كومپونەنتتەرىن وندىرەتىن كاسىپورىن مەن اليۋميني كومپوزيتتىك پانەلدەر زاۋىتى اشىلدى. ماقتاارال اۋدانىندا ماقتا مايىن وڭدەۋ، جەتىساي جانە وتىرار اۋداندارىندا ماقتا وڭدەۋ كاسىپورىندارى ىسكە قوسىلدى. سايرام اۋدانىندا بيداي ونىمدەرىن وڭدەيتىن ديىرمەن مەن ازىق-تۇلىك قويماسى پايدالانۋعا بەرىلدى. كەنتاۋ قالاسىندا ونەركاسىپكە ارنالعان تەحنولوگيالىق توراپتار وندىرەتىن زاۋىت اشىلدى.
بۇل جوبالار وڭىردە شيكىزاتتى تەرەڭ وڭدەۋگە، جەرگىلىكتى ءوندىرىس كولەمىن ارتتىرۋعا جانە جاڭا جۇمىس ورىندارىن قۇرۋعا مۇمكىندىك بەرەدى. ماسەلەن، جەكە ينۆەستيتسيالىق جوبالار اياسىندا 477 ادامدى، بيۋدجەتتىك ينۆەستيتسيالار ەسەبىنەن جۇزەگە اسىرىلاتىن جوبالار اياسىندا 171 ادامدى جۇمىسپەن قامتۋ جوسپارلانىپ، مەجەگە قول جەتتى.
جالپى، رەسپۋبليكا كۇنى قارساڭىندا پايدالانۋعا بەرىلگەن نىساندار تۇركىستان وبلىسىنىڭ الەۋمەتتىك-ەكونوميكالىق دامۋىنا سەرپىن بەرىپ، تۇرعىندارعا قولايلى جاعداي جاساۋعا، كاسىپكەرلىكتى قولداۋعا جانە ينۆەستيتسيالىق تارتىمدىلىقتى ارتتىرۋعا باعىتتالعان. جىل سوڭىنا دەيىن تاعى دا الەۋمەتتىك نىساندار مەن ءوندىرىس ورىندارىن اشۋ جوسپارلانىپ وتىر.
