تۇركىستانداعى 5574 اسكەري بولىمىندە وتان قورعاۋشىلار كۇنى قارساڭىندا اسكەري پلاتس-كونتسەرت ۇيىمداستىرىلدى.
سالتاناتتى جيىنعا وبلىستىق پوليتسيا دەپارتامەنتى، قورعانىس ىستەرى جونىندەگى دەپارتامەنتى، توتەنشە جاعدايلار دەپارتامەنتى وكىلدەرى، اۋماقتىق قورعانىس بريگاداسى، ۇلتتىق ۇلان اسكەرلەرى، ارداگەرلەر مەن جاس ساربازدار قاتىستى. تۇركىستان وبلىسىنىڭ اكىمى نۇرالحان كوشەروۆ كوپشىلىكتى مەرەكەمەن قۇتتىقتادى.
– قۇرمەتتى ارداگەرلەر! ايبىندى ساردارلار مەن ساربازدار! سىزدەردى 7 مامىر – وتان قورعاۋشىلار كۇنىمەن شىن جۇرەكتەن قۇتتىقتايمىن! تۋعان جەردى قورعاۋ – ءار ازاماتتىڭ قاسيەتتى بورىشى. باتىر بابالارىمىز ەل ءۇشىن جان قيىپ، تاۋەلسىزدىكتى امانات ەتتى. سول اماناتقا ادال بولۋ – بۇگىنگى بۋىننىڭ مىندەتى. ەلىمىزدىڭ تاريحىندا ەرلىك پەن وتانشىلدىق قاسيەتتەر ءاردايىم بيىك تۇرعان. ەل قورعانىسىن نىعايتۋ – مەملەكەتىمىزدىڭ باستى مىندەتتەرىنىڭ ءبىرى. مەملەكەت باسشىسى قاسىم-جومارت كەمەلۇلى توقاەۆ: «ەل قاۋىپسىزدىگى مەن شەكاراسىن قاس قاقپاي كۇزەتۋ، زاڭ مەن ءتارتىپ ۇستەمدىگىن قامتاماسىز ەتۋ – جاۋاپتى ءارى قاستەرلى مىندەت. مۇنى تەك كاسىبي دەڭگەيى جوعارى، انت پەن بورىشقا ادال، ەل ءۇشىن ايانبايتىن باتىل جاندار عانا اتقارا الادى» دەگەن بولاتىن. سوندىقتان جاستارىمىزدىڭ بويىندا وتانشىلدىق رۋحتى قالىپتاستىرۋ – اسا ماڭىزدى. تۇركىستان وڭىرىندە بۇل باعىتتا جۇيەلى جۇمىستار جۇرگىزىلۋدە. قازاق حالقى – ەجەلدەن ەر جۇرەك، نامىستى حالىق. ەرلىك پەن وتانشىلدىق – قانىمىزعا سىڭگەن قاسيەت. بۇل قاسيەتتەر ۇرپاقتان-ۇرپاققا جالعاسىپ، ەلدىڭ تۇتاستىعىن ساقتاۋعا قىزمەت ەتىپ كەلەدى. بارشاڭىزدى ايتۋلى مەرەكەمەن تاعى دا قۇتتىقتايمىن! ەلىمىزدىڭ ايبىنى اسقاق، شەكاراسى بەرىك، اسپانى اشىق بولا بەرسىن! تاۋەلسىزدىگىمىز ماڭگىلىككە ۇلاسسىن! – دەدى نۇرالحان كوشەروۆ.
ءوڭىر باسشىسى ەل قاۋىپسىزدىگىن قامتاماسىز ەتۋ جولىنداعى ءمىنسىز قىزمەتى ءۇشىن بىرقاتار اسكەري قىزمەتشىنى ماراپاتتادى.
وتانشىلدىق دارىپتەلگەن ءىس-شارادا «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى، گەنەرال-مايور ەرجان ىبىراەۆ جانە «قارۋلى كۇشتەرىنىڭ ارداگەرلەرى» رەسپۋبليكالىق قوعامدىق بىرلەستىگىنىڭ تۇركىستان وبلىستىق فيليالىنىڭ توراعاسى باباي الدابەرگەنوۆ قۇتتىقتاۋ ءسوز سويلەپ، اسكەري قىزمەتتىڭ ماڭىزى مەن ۇرپاق تاربيەسىندەگى ءرولىن اتاپ ءوتتى. ودان كەيىن وبلىس باسشىسى مەن ارداگەرلەر اسكەري تەحنيكالاردى كورىپ، ساربازدارمەن پىكىر الماستى.
سالتاناتتى جيىن مەرەكەلىك كونتسەرتتىك باعدارلاماعا ۇلاسىپ، پاتريوتتىق اندەر شىرقالدى.
ايتا كەتەيىك، وتكەن جىلى تۇركىستان وبلىسىنان 5 مىڭداي جىگىت اسكەر قاتارىنا قوسىلدى. بيىل دا بۇل ءۇردىس جالعاسىپ، ءوڭىر جاستارى قازاقستان قارۋلى كۇشتەرىنىڭ قاتارىن تولىقتىرىپ جاتىر.
