تۇركىستان قالاسىنداعى «دوستىق» ۇيىندە قوجا احمەت ياساۋيدىڭ رۋحاني-فيلوسوفيالىق مۇراسىن كەڭىنەن دارىپتەۋگە ارنالعان «ياساۋي كەرۋەنى» عىلىمي-تانىمدىق سەمينارى ءوتتى. اۋقىمدى رۋحاني-اعارتۋشىلىق جوبا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن، مەملەكەت باسشىسى قاسىم-جومارت توقاەۆتىڭ ۇلتتىق قۇندىلىقتاردى جاڭعىرتۋ، تاريحي تۇلعالاردىڭ مۇراسىن كەڭىنەن ناسيحاتتاۋ جونىندەگى تاپسىرمالارىن ىسكە اسىرۋ ماقساتىندا ۇيىمداستىرىلدى.
ءىس-شاراعا وبلىس اكىمىنىڭ ورىنباسارى ەرتاي التاەۆ، مەملەكەتتىك ورگانداردىڭ وكىلدەرى، عالىمدار، تەولوگتار، ءدىنتانۋشىلار، زيالى قاۋىم، جاستار جانە بۇقارالىق اقپارات قۇرالدارىنىڭ وكىلدەرى قاتىستى.
سەميناردى «ازىرەت سۇلتان» ۇلتتىق تاريحي-مادەني مۋزەي-قورىعىنىڭ ديرەكتورى ەرلان داكەنوۆ جۇرگىزدى. ول قوجا احمەت ياساۋيدىڭ رۋحاني مۇراسى ۇلتتىق بىرەگەيلىكتى نىعايتۋعا، وسكەلەڭ ۇرپاقتى ىزگىلىككە، ادامگەرشىلىككە جانە وتانسۇيگىشتىككە تاربيەلەۋگە قىزمەت ەتەتىنىن اتاپ ءوتتى.
جيىندا تۇركىستان وبلىستىق ءماسليحاتىنىڭ توراعاسى نۇرالى ءابىشوۆ ءسوز سويلەپ، مەملەكەت باسشىسى جۇكتەگەن مىندەتتەر اياسىندا ياساۋي مۇراسىن عىلىمي تۇرعىدان زەرتتەۋ مەن كەڭىنەن ناسيحاتتاۋدىڭ ماڭىزدىلىعىنا توقتالدى. ءوڭىر باسشىسىنىڭ قۇتتىقتاۋ حاتى مەن سالەمىن جەتكىزدى. ءماسليحات توراعاسى «ياساۋي كەرۋەنى» جوباسى ءوڭىر تۇرعىندارىنىڭ تاريحي ساناسىن قالىپتاستىرۋعا، ۇلتتىق قۇندىلىقتاردى دارىپتەۋگە جانە قوعامداعى رۋحاني تۇتاستىقتى نىعايتۋعا سەرپىن بەرەتىنىن اتاپ ءوتتى.
سەمينار بارىسىندا قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ پروفەسسورى، تەولوگيا عىلىمدارىنىڭ دوكتورى دوساي كەنجەتاي «قوجا احمەت ياساۋي مۇراسىنىڭ تاريحي جانە رۋحاني ماڭىزى» تاقىرىبىندا بايانداما جاسادى. عالىم ۇلى ويشىلدىڭ تۇركى دۇنيەسىندەگى ورنىنا جانە ونىڭ ءىلىمىنىڭ قازىرگى قوعام ءۇشىن وزەكتىلىگىنە جان-جاقتى توقتالدى. ۋنيۆەرسيتەت دوتسەنتى، ءدىنتانۋشى سەرجان ورازباي «ياساۋي حيكمەتتەرىندەگى رۋحاني قۇندىلىقتار» تاقىرىبىندا بايانداما جاساپ، «ديۋاني حيكمەت» ەڭبەگىندەگى ادامگەرشىلىك، يماندىلىق جانە رۋحاني كەمەلدەنۋ يدەيالارىنىڭ تاربيەلىك ماڭىزىن ءتۇسىندىردى.
«ياسساۋيتانۋ» عىلىمي-زەرتتەۋ ينستيتۋتىنىڭ ديرەكتورى، تەولوگيا عىلىمدارىنىڭ دوكتورى باۋىرجان سايفۋنوۆ «قوجا احمەت ياساۋيدىڭ تاريحي تۇلعاسى جانە ۇلتتىق يدەنتيفيكاتسيا» تاقىرىبىندا بايانداما جاساپ، ياسساۋي مۇراسىنىڭ ۇلتتىق سانانى قالىپتاستىرۋداعى ورنىنا نازار اۋداردى. فيلوسوفيا دوكتورى تولەگەن مۇحيت ياسساۋي ءىلىمى مەن قازاق حالقىنىڭ سالت-داستۇرلەرى اراسىنداعى تاريحي جانە رۋحاني ساباقتاستىق ماسەلەلەرىن كەڭىنەن تالداپ بەردى.
ءىس-شارا بارىسىندا قاتىسۋشىلار قوجا احمەت ياساۋي مۇراسىن عىلىمي تۇرعىدان زەرتتەۋ، جاستار اراسىندا ناسيحاتتاۋ جانە رۋحاني قۇندىلىقتاردى قوعامدىق ومىرگە كەڭىنەن ەنگىزۋ باعىتتارى بويىنشا پىكىر الماستى.
ساراپشىلار ياساۋي مۇراسىن دارىپتەۋ رۋحاني قاۋىپسىزدىكتى نىعايتۋدىڭ، ۇلتتىق تۇتاستىقتى ساقتاۋدىڭ جانە ءداستۇرلى قۇندىلىقتاردى ۇرپاق ساناسىنا ءسىڭىرۋدىڭ ماڭىزدى تەتىكتەرىنىڭ ءبىرى ەكەنىن اتاپ ءوتتى.
تۇركىستان وبلىسىنىڭ ءدىن ىستەرى باسقارماسىنىڭ مالىمەتىنشە، «ياساۋي كەرۋەنى» جوباسى الداعى ۋاقىتتا وبلىستىڭ بارلىق قالا جانە اۋداندارىندا جالعاسادى. جوبا اياسىندا تۇرعىندارعا ارنالعان عىلىمي-تانىمدىق كەزدەسۋلەر، سەمينارلار جانە رۋحاني-اعارتۋشىلىق ءىس-شارالار ۇيىمداستىرىلادى.
قوجا احمەت ياساۋي مۇراسىن كەڭىنەن تانىتۋعا باعىتتالعان جوبا ءوڭىر تۇرعىندارىنىڭ تاريحي-رۋحاني قۇندىلىقتارعا دەگەن قىزىعۋشىلىعىن ارتتىرىپ، قوعامداعى رۋحاني كەلىسىم مەن ۇلتتىق بىرلىكتى نىعايتۋعا ىقپال ەتپەك.
