(الاقانداي ءازاسوز)
امانجول قوشانوۆ... كورنەكتى ەكونوميست-عالىم. ۇلتتىق عىلىم اكادەمياسىنىڭ تولىق مۇشەسى. مەملەكەتتىك سىيلىقتىڭ لاۋرەاتى. ماسكەۋ مەملەكەتتىك ۋنيۆەرسيتەتىنىڭ تۇلەگى. كلاسسيكالىق ۇلگىدەگى زەردەلى زەرتتەۋشى. ىلگەرىدەگى قۇنارى قالىڭ عىلىمنىڭ كورىگىندە شىڭدالعان ايبارلى اكادەميك.
تىم جاقىن ارالاسپاي-اق ءجۇرىس-تۇرىسىنان، ءىس-قيمىلىنان، بولمىس-بىتىمىنەن، ءسوز ساپتاۋىنان ونەگە الاتىن كوشەلى كىسىلەر بولادى. ءبىز، عىلىمنىڭ كەيىنگى بۋىن وكىلدەرى، امانجول اعانى وسىلايشا تانىدىق. ويلانباي سويلەمەيدى، تياناقتاماي تۇجىرىم جاسامايدى، تەكسەرمەي تاۋەكەل ەتپەيدى. قىسقاسى، ءار قادامىن انىق باسادى. ءبىر شارۋانى باستاماس بۇرىن ەلەپ-ەكشەيدى، بايقاپ-بەزبەندەيدى. سوندىقتان ءاربىر ءسوزى ءمىردىڭ وعىنداي، ءاربىر ءىسى دۇرىستىق جولىنداي بوپ شىعادى. زيالىلاردىڭ زيالىسى دەگەن ۇعىمعا تولىق ساي كەلەتىن قادىرلى قازاقتىڭ ءبىرى سول ەدى. عىلىم اكادەمياسى باسشىلارىنىڭ ءبىرى بولعان تۇستا، گۋمانيتارلىق عىلىمداردىڭ وركەندەۋىنە ايرىقشا ۇلەس قوستى. جاس بۋىندى بارىنشا قولداۋعا تىرىستى.
ەلدىڭ الدىنا جارقىلداپ كوپ جۇرگەن جوق. ءسات سايىن سۇحبات بەرىپ، ءوزى تۋرالى ماقالا جازدىرۋعا اۋەستەنىپ، جۋرناليستەردىڭ ميىن جەيتىن داعدىدان مەيلىنشە اۋلاق بولدى. ينتەرنەتتى جاقسىلاپ ءسۇزىپ كورىڭىزشى، ونى شەكتەن تىس دارىپتەگەن ماردىمدى بىردەڭە تابار ما ەكەنسىز. ويتكەنى، ول ءوز سالاسىندا لايىقتى ورنى بار بەدەلدى عالىم بولسا دا، ۇنەمى قاراپايىمدىلىق قاعيداسىن بەرىك ۇستاندى. بىلايشا ايتقاندا، ادەمى قارتايدى.
ءبىزدىڭ بىلەتىنىمىز، امانجول اعا – ايگىلى شال اقىننىڭ ۇرپاعى. كادىمگى «ساياسى جوق بايتەرەك، سازداۋعا بىتكەن تالمەن تەڭ. جاقسى اعاڭىز بار بولسا، الدىڭدا سارى بەلمەن تەڭ» دەپ جىرلاعان شال قۇلەكەۇلىن ايتىپ وتىرمىز. شىنىندا دا، جاقسى اعامىز ەدى، كوپكە ساياسى مول ەدى.
كەشە عانا اتاقتى اكادەميك ومىردەن وزدى. سول باياعى شال اقىن ايتقانداي:
ءوتتىڭ ءبىر دۇنيە ءوتتىڭ-اي،
تەڭسەلە باسىپ كەتتىڭ-اي...
باقۇل بولىڭىز، ارداقتى ازامات!
باۋىرجان ومارۇلى
