تۇركىستان وبلىسىندا دۇنيەجۇزىلىك ماقتا كۇنىنە وراي «AQ-DALA – 2026» سالتاناتتى ءىس-شاراسى ءوتتى. وتىرار اۋدانى قاراقوڭىر اۋىلدىق وكرۋگىندەگى «تۇركىستان ماقتا اگروونەركاسىپتىك كەشەنى» جشس ماقتا القابىندا وتكەن ءىس-شاراعا وبلىس اكىمى نۇرالحان كوشەروۆ، ءوڭىر تۇرعىندارى مەن ەڭبەك ادامدارى قاتىستى.
مەملەكەت باسشىسى قاسىم-جومارت توقاەۆ قوعامدا ادال ەڭبەك پەن ەڭبەك ادامىنىڭ مارتەبەسىن ارتتىرۋدىڭ ماڭىزىن ۇنەمى ايتىپ كەلەدى. بۇگىنگى شارا «ادال ازامات – ادال ەڭبەك – ادال تابىس» قاعيداتىنا سۇيەنە وتىرىپ، قۇندىلىقتاردىڭ ساباقتاستىعىن ايقىندايدى.
سالتاناتتى شارادا وبلىس باسشىسى نۇرالحان كوشەروۆ كوپشىلىكتى مەرەكەمەن قۇتتىقتاپ، اۋىل شارۋشىلىعى سالاسىنداعى جەتىستىكتەرگە توقتالدى.
– بۇگىن ءبىز وتىراردىڭ اق دالاسىندا جينالىپ، اق التىن وسىرگەن ازاماتتاردىڭ ەڭبەگىنە قۇرمەت كورسەتىپ وتىرمىز. بۇل مەرەكەنىڭ باستى كەيىپكەرلەرى – ءدان وسىرەتىن ديقاندار، ءونىم جينايتىن مەحانيزاتورلار، سۋ جەتكىزەتىن ماماندار مەن ماقتانى وڭدەيتىن ەڭبەككەرلەر. تۇركىستان وبلىسى ءۇشىن ماقتا – نەگىزگى اۋىل شارۋاشىلىعى داقىلدارىنىڭ ءبىرى. ونى ءوسىرۋ، جيناۋ جانە وڭدەۋ مىڭداعان تۇرعىننىڭ ەڭبەگىمەن بايلانىستى. سوندىقتان اق التىننىڭ قادىرى، ەڭ الدىمەن، ونى وسىرگەن ادامنىڭ ەڭبەگىمەن ولشەنەدى. بيىل وبلىستا ماقتا 173,6 مىڭ گەكتارعا ەگىلدى. قازىر القاپتاردا جيىن-تەرىم جۇمىستارى جۇرگىزىلۋدە. ماۋسىم قورىتىندىسىمەن 556 مىڭ توننا ماقتا جيناۋ كوزدەلۋدە (32 تس/گا).
مەملەكەت باسشىسى قاسىم-جومارت كەمەلۇلى توقاەۆ اۋىل شارۋاشىلىعىندا وزىق تەحنولوگيالاردى كەڭىنەن ەنگىزىپ، سۋ ۇنەمدەۋگە باتىل كوشۋ جونىندە ناقتى تاپسىرما بەردى. سۋ تاپشىلىعى سەزىلەتىن ءبىزدىڭ ءوڭىر ءۇشىن بۇل – كۇندەلىكتى جۇمىستىڭ باستى باعىتى. بۇگىندە ماقتا القابىنىڭ 91 مىڭ گەكتارىندا سۋ ۇنەمدەۋ تەحنولوگيالارى قولدانىلۋدا. جەكەلەگەن القاپتاردا گەكتارىنا 60 تسەنتنەرگە دەيىن ءونىم الىنۋى سۋدى ۇقىپتى پايدالانۋ مەن جاڭا تاسىلدەردىڭ ناتيجەسىن كورسەتەدى.
ءبىزدىڭ ماقساتىمىز – ماقتانى وسىرۋمەن شەكتەلمەي، ودان تۇسەتىن تابىستىڭ كوبىرەك بولىگىن ءوز وڭىرىمىزدە قالىپتاستىرۋ. وسى باعىتتا ماقتا وسىرۋدەن باستاپ وڭدەۋ، ءجىپ ءيىرۋ جانە دايىن توقىما ءونىمىن شىعارۋعا دەيىنگى تولىق تىزبەكتى قامتيتىن ەلىمىزدە تەڭدەسى جوق كلاستەر قالىپتاسىپ كەلەدى. بۇگىن سىزدەر وسى كلاستەرلىك جوبالاردىڭ العاشقىسى – «تۇركىستان ماقتا اگروونەركاسىپتىك كەشەنى» جشس-نىڭ جوباسىمەن تانىسىپ وتىرسىزدار. ءبىز تۇركىستان ماقتاسىن شيكىزات كۇيىندە عانا وتكىزبەي، ونى تەرەڭ وڭدەپ، دايىن ونىمگە اينالدىراتىن زاماناۋي ءوندىرىس جۇيەسىن قالىپتاستىرۋدى كوزدەيمىز. جالپى اگرارلىق سالاعا شەتەلدىك ينۆەستورلاردى تارتىپ، ولاردىڭ وزىق تەحنولوگيالارى مەن وندىرىستىك تاجىريبەسىن وڭىرىمىزگە اكەلىپ جاتىرمىز. ەندىگى مىندەت – وسى تاجىريبەنى ءوزىمىز تولىق مەڭگەرۋ. ينۆەستيتسيانىڭ ناتيجەسىن ءبىز تۇراقتى جۇمىس ورىندارىنان عانا ەمەس، وزىمىزدە قالىپتاسقان بىلىكتى كادرلار مەن باسەكەگە قابىلەتتى دايىن ونىمنەن دە كورەتەمىز. سىزدەردىڭ جەتىستىكتەرىڭىز – ءبىر كۇننىڭ ەمەس، جىلدار بويعى ادال ەڭبەكتىڭ ناتيجەسى. اق التىندى ءوسىرىپ، تۋعان جەردىڭ بەرەكەسىن ارتتىرىپ جۇرگەن بارشاڭىزعا شىنايى العىسىمدى بىلدىرەمىن. ەگىن بىتىك شىعىپ، ءار ماۋسىم قۋانىش پەن مولشىلىق اكەلسىن! – دەدى نۇرالحان ورالبايۇلى.
سونداي-اق ءىس-شارا بارىسىندا وبلىس اكىمى ءبىر توپ وزات ەڭبەككەرگە قر اۋىل شارۋاشىلىعى مينيسترلىگىنىڭ «ەڭبەك ارداگەرى» مەدالىن، «اۋىل شارۋاشىلىعى ۇزدىگى» توسبەلگىسىن تابىستاپ، ۇزدىكتەردى «قۇرمەت» گراموتاسى جانە تۇركىستان وبلىسى اكىمىنىڭ ماقتا شارۋاشىلىعىنىڭ ۇزدىگى ديپلومىمەن ماراپاتتادى.
تۇركىستان وبلىسى – ەلىمىزدەگى ماقتا داقىلىن وسىرەتىن جالعىز ءوڭىر. وڭىردە ماقتانى وسىرۋدەن باستاپ ونى وڭدەۋ، ءجىپ ءيىرۋ جانە دايىن توقىما ونىمدەرىن شىعارۋعا دەيىنگى تولىق وندىرىستىك تىزبەك قالىپتاسىپ كەلەدى. 2030 جىلعا دەيىن وبلىستا جالپى قۇنى 212,6 ملرد تەڭگەنى قۇرايتىن 5 كلاستەر ىسكە اسىرىلادى. ناتيجەسىندە جىلىنا 229,5 مىڭ توننا دايىن ءونىم ءوندىرىلىپ، 7 مىڭنان استام جۇمىس ورنىن اشۋ جوسپارلانىپ وتىر.
بۇگىنگى كۇننىڭ وزىندە «تۇركىستان ماقتا اگروونەركاسىپتىك كەشەنى» جشس وزىق تەحنولوگيالاردى پايدالانىپ، 52 مىڭ گەكتارعا ماقتا ەگىپ وتىر. جالپى قۋاتى 180 مىڭ توننا بولاتىن 2 ماقتا وڭدەۋ زاۋىتى، تامشىلاتىپ سۋارۋ تاسپاسى مەن پۆح قۇبىرلارىن وندىرەتىن زاۋىتتار، سونداي-اق ءجىپ ءيىرۋ فابريكاسى ىسكە قوسىلدى. ناتيجەسىندە 1200 جۇمىس ورنى اشىلدى. ودان بولەك، تاعى 2 ماقتا وڭدەۋ زاۋىتىن جانە جىلىنا 5 مىڭ توننا ماقتا تۇقىمىن وندىرەتىن زاۋىتتى ىسكە قوسۋ جوسپارلانۋدا. ال «TURAN» ارنايى ەكونوميكالىق ايماعىندا جىلىنا 45 ملن شارشى مەتر توقىما ەمەس ماتەريال شىعاراتىن زاۋىت، 45 ملن شارشى مەتر ماتا بويايتىن زاۋىت ىسكە قوسىلادى. سونداي-اق مۇندا جىلىنا 7 ملن جيىنتىققا دەيىن توقىما بۇيىمدارى مەن كيىم وندىرەتىن تىگىن فابريكاسى جانە دجينس ماتالارىن وندىرەتىن كاسىپورىن ىسكە قوسىلماق.
وبلىستا مول ءونىمدى قابىلداۋعا جانە وڭدەۋگە قۋاتتى ينفراقۇرىلىم بار. وڭىردەگى 29 ماقتا وڭدەۋ زاۋىتى مەن 169 قابىلداۋ بەكەتى جىلىنا 1 ملن توننادان استام ءشيتتى ماقتانى قابىلداپ، وڭدەۋگە مۇمكىندىك بەرەدى. ماقتا شارۋاشىلىعىنداعى 25 مىڭعا جۋىق اگروقۇرىلىمدا 70 مىڭعا جۋىق ادام ەڭبەك ەتەدى.
2025 جىل – ماقتاشىلاردىڭ رەكوردتىق جەتىستىك جىلى بولدى. وبلىستا 466 مىڭ تونناعا جۋىق ءشيتتى ماقتا جينالىپ، ورتاشا تۇسىمدىلىك گەكتارىنا 32 تسەنتنەرگە جەتتى. بۇل سوڭعى 20 جىلداعى ەڭ جوعارى ناتيجە.
مەرەكەلىك ءىس-شارا بارىسىندا اۋىل شارۋاشىلىعى سالاسىنداعى زاماناۋي تەحنولوگيالار، جەرگىلىكتى وندىرۋشىلەردىڭ ونىمدەرى مەن ازىق-تۇلىك تاۋارلارىنىڭ كورمەسى ۇيىمداستىرىلدى. سونىمەن قاتار كوپشىلىك نازارىنا كونتسەرتتىك باعدارلاما ۇسىنىلدى.
«AQ-DALA – 2026» شاراسى – ماقتا شارۋاشىلىعىنىڭ جەتىستىگىن عانا ەمەس، ەڭبەك ادامىنىڭ ەڭبەگىن، جاڭا تەحنولوگيانى مەڭگەرگەن مامانداردى جانە اۋىلداعى جاڭا مۇمكىندىكتەردى دارىپتەيتىن ماڭىزدى الاڭ.
