پرەزيدەنت قاسىم-جومارت توقاەۆ اتوم ەنەرگياسى جونىندەگى حالىقارالىق اگەنتتىك باس ديرەكتورى رافاەل گروسسيمەن كەزدەسۋ وتكىزدى، دەپ حابارلايدى "ادىرنا" ۇلتتىق پورتالى.
اقوردا مالىمەتىنشە، تاراپتار قازاقستان مەن اەحا اراسىنداعى ىنتىماقتاستىق پەرسپەكتيۆالارىن، سونداي-اق يادرولىق قاۋىپسىزدىك سالاسىنداعى حالىقارالىق كۇن ءتارتىبىنىڭ وزەكتى ماسەلەلەرىن تالقىلادى.
پرەزيدەنت قازاقستاننىڭ اگەنتتىكپەن كوپجىلدىق سەرىكتەستىكتى جوعارى باعالايتىنىن اتاپ ءوتتى.
ء«سىزدىڭ 2023 جىلعى ساۋىردەگى قازاقستانعا العاشقى ساپارىڭىز ىنتىماقتاستىعىمىزعا قوسىمشا سەرپىن بەردى. يادرولىق قارۋسىزدانۋ جانە تاراتپاۋ ماسەلەلەرىندە ءبىزدىڭ ۇستانىمدارىمىز ۇقساس دەپ سانايمىن. قازىرگى الەمدەگى كۇردەلى جاعداي جاھاندىق ماسەلەلەردى شەشۋدە كۇش بىرىكتىرۋدى تالاپ ەتەدى»، – دەدى قاسىم-جومارت توقاەۆ.
مەملەكەت باسشىسى قازاقستان مەن اەحا اراسىنداعى ىنتىماقتاستىقتى 2036 جىلعا دەيىن تەرەڭدەتۋ جونىندەگى جول كارتاسىنىڭ، سونداي-اق يادرولىق مەديتسينا مەن عىلىم سالاسىنداعى بىرقاتار قۇجاتتاردىڭ قابىلدانۋىن قۇپتادى.
ءوز كەزەگىندە رافاەل گروسسي قازاقستاننىڭ جاھاندىق يادرولىق قاۋىپسىزدىكتى نىعايتۋعا جانە يادرولىق قارۋدى تاراتپاۋ رەجيمىنە تۇراقتى تۇردە ۇلەس قوسىپ كەلە جاتقانىن اتاپ ءوتتى.
سونداي-اق ول قازاقستاندا جالپىۇلتتىق رەفەرەندۋم ناتيجەسىندە قابىلدانعان اتوم ەنەرگەتيكاسىن دامىتۋ باعدارلاماسىنىڭ ىسكە قوسىلۋىن قۇتتىقتادى.
كەزدەسۋ سوڭىندا مەملەكەت باسشىسى رافاەل گروسسيگە بۇۇ باس حاتشىسى لاۋازىمىنا كانديداتۋراسىن ۇسىنۋ ىسىندە ساتتىلىك تىلەدى.
