استانا قالاسى ءماسليحاتىنىڭ دەپۋتاتى باۋىرجان سمايلوۆ ەلوردادا ورتالىق ازياداعى ەڭ ءىرى كافەدرالدى پراۆوسلاۆيە شىركەۋىن سالۋعا قارسىلىق ءبىلدىردى، دەپ حابارلايدى «ادىرنا» ءتىلشىسى.
«سىزدەر ورتالىق ازياداعى ەڭ ۇلكەن شىركەۋدى سالاتىنىڭىزدى ايتتىڭىزدار. ونى كىم قارجىلاندىرادى؟ بىزگە وسىنداي شىركەۋ شىنىمەن كەرەك پە؟ بۇل ماسەلە تالقىلاندى ما؟ ونىڭ قاجەتتىلىگى زەرتتەلدى مە؟ بىزدە ۇلكەن دە، كىشكەنتاي دا شىركەۋلەر بار. قالاعا كىرە بەرىستە وسىنداي الىپ شىركەۋ سالۋ، مەنىڭ ويىمشا، ماقتاناتىن جاعداي ەمەس»،-دەدى ول.
نۇرا اۋدانىنىڭ اكىمى ريشات تۇردىبەكوۆ جوبانىڭ 2018–2019 جىلدارى بەكىتىلگەنىن جانە قۇرىلىسقا بيۋدجەت قاراجاتتارى بولىنبەيتىنىن، تەك قايىرىمدىلىق قاراجاتتارى ارقىلى جۇزەگە اسىرىلاتىنىن ءتۇسىندىردى. سونداي-اق ول بۇل ماسەلە بويىنشا كەيىن قوسىمشا اقپارات بەرەتىنىن اتاپ ءوتتى.
