استانانىڭ كەي اۋدانىندا سۋ جەتىسپەۋشىلىگى بار دەيدى تانىستارىمىز. نەگىزى سۋ ماسەلەسى ءبىزدىڭ ەلىمىز ءۇشىن الداعى تاڭدا وتە وزەكتى، باستى ماسەلە بولادى. ەلىمىزدەگى ىلە، ەرتىس، سىرداريا، شۋ، تالاس، جايىق جانە باسقا ءىرى وزەندەردىڭ بارلىعى دەرلىك باستاۋىن باسقا ەلدەن الادى.
مەملەكەتكە تۇتاس سۋ ساياساتىن قايتا قاراۋ كەرەك. سۋدى ۇنەمدەۋگە قاتىستى تىڭ شارالار قاجەت. بالالاردى سۋدى ۇنەمدەۋ مادەنيەتىنە بالاباقشا/مەكتەپتەن ۇيرەتۋ كەرەك. اۋىل شارۋاشىلىعىندا تامشىلاتۋ سىندى سۋدى از قاجەت ەتەتىن تەحنولوگيالاردى ەنگىزۋدە مەملەكەت شارۋالارعا قولداۋ كورسەتۋى ماڭىزدى. سۋ ساقتاۋ قويمالارىنىڭ سانىن ارتتىرۋ، قىستاعى قار سۋىن جۇيەلى جيناۋ ارەكەتتەرى ىسكە اسۋى ءتيىس. بۇل ىسكە اسۋعا ءتيىس شارالاردىڭ ءبىر سىپىراسى عانا.
وتكەندە يران مەن تالىبتەر گيلمەند وزەنى ءۇشىن اتىسىپ-شابىستى. تالىبتەر سۋ قويماسىن سالىپ جاتىر، ول يرانداعى سۋ تاپشىلىعىن ارتتىرادى. دەمەك بولاشاقتا قاقتىعىس جاڭا قارقىنمەن جاندانۋى مۇمكىن.
ال بىزدە شە؟ تاجىكستان دا سۋ قويمالارىن سالۋدا. ول ورتالىق ازياداعى سۋ ماسەلەسىن كۇردەلەندىرەدى. قىتاي شىعىس تۇركىستاندا سۋ بوگەتتەرىن سالۋدا. بۇل ءبىزدىڭ اۋماعىمىزداعى ىلە پەن ەرتىستىڭ سۋ دەڭگەيىن تۇسىرۋدە. ءدال وسىنداي كورىنىس وڭتۇستىكتە دە، باتىستا دا بار. الدىڭعى ونجىلدىقتا سۋ ءۇشىن كورشىلەس ەلدەرمەن كۇردەلى كەلىسسوزدەر وتەدى دەگەن ءسوز.
ەۋروپا حالقى پايدالانعان سۋىن بىرنەشە مارتە قولدانادى دەگەندى ەستىپ وستىك قوي. اراسىندا كۇلدىك تە. سونداي كەزەڭگە ءوزىمىز دە اقىرىنداپ جاقىنداپ قالعاندايمىز با، قالاي؟..ادامزات قازىر مۇناي/گاز ءۇشىن قىرقىسسا، الدا سۋ ءۇشىن سوعىسادى. كورىنىستەرى قازىردىڭ وزىندە بار.
