قازاقستان بۇۇ-نىڭ ەلەكتروندىق ۇكىمەتتى دامىتۋ رەيتينگىندە 16-ورىنعا كوتەرىلدى

220
Adyrna.kz Telegram
https://www.adyrna.kz/storage/uploads/qNUMCwUwvKPX8vsvgExyNheuBEpCbKMsyPQIeRSO.jpg

فوتو: stat.gov.kz

قازاقستان بىرىككەن ۇلتتار ۇيىمىنىڭ ەلەكتروندىق ۇكىمەتتى دامىتۋ يندەكسىندە (UN EGDI) 24-ورىننان 16-ورىنعا كوتەرىلىپ، العاش رەت ەڭ جوعارى رەيتينگتىك ساناتقا ەندى. بۇل تۋرالى 20 قاراشادا قر جاساندى ينتەللەكت جانە تسيفرلىق دامۋ مينيسترلىگىنىڭ ءباسپاسوز قىزمەتى حابارلادى، دەپ جازادى "ادىرنا".

ۆەدومستۆو مالىمەتىنشە، سوڭعى ەكى جىلدا قازاقستان رەيتينگتە 8 ساتىعا جوعارىلاعان. بۇۇ بايانداماسىندا بۇل كورسەتكىش كوشباسشى ەلدەر اراسىنداعى ەڭ ەلەۋلى ىلگەرىلەۋدىڭ ءبىرى رەتىندە باعالانعان. سونىمەن قاتار قازاقستان وڭىردە اتالعان دەڭگەيگە جەتكەن العاشقى مەملەكەت اتاندى.

ەڭ جوعارى رەيتينگتىك ساناتقا ەلەكتروندىق ۇكىمەتى بارىنشا دامىعان الەمنىڭ 21 مەملەكەتى كىرەدى. ولاردىڭ قاتارىندا قازاقستانمەن بىرگە كورەيا، دانيا، سينگاپۋر، ۇلىبريتانيا، ەستونيا جانە اقش بار. 2026 جىلى بۇل ساناتقا العاش رەت قازاقستان، يرلانديا جانە پولشا قوسىلدى.

سونداي-اق سوڭعى ەكى جىلدا قازاقستان 2024 جىلعى رەيتينگتە وزىنەن جوعارى تۇرعان شۆەتسيا، گەرمانيا، يرلانديا، جاڭا زەلانديا، اۆستريا جانە جاپونيادان وزىپ كەتكەن.

ەلدىڭ ەلەكتروندىق ۇكىمەتتى دامىتۋ يندەكسى 0,9009-دان 0,9363-كە دەيىن ءوستى. ال الەمدىك ورتاشا كورسەتكىش 0,6675 دەڭگەيىندە قالىپتاستى.

مينيسترلىكتىڭ حابارلاۋىنشا، بۇل جەتىستىك مەملەكەت باسشىسىنىڭ قازاقستاندى تولىققاندى تسيفرلىق ەلگە اينالدىرۋ جونىندەگى تاپسىرمالارىن جۇزەگە اسىرۋمەن بايلانىستى. اتاپ ايتقاندا، مەملەكەتتىك باسقارۋدى ترانسفورماتسيالاۋ جانە جاساندى ينتەللەكتىنى دامىتۋ ەلدىڭ تسيفرلىق الەۋەتىن ارتتىرۋداعى باسىم باعىتتاردىڭ ءبىرى سانالادى.

پىكىرلەر