قازاقستاندا وزبەكستان ازاماتى، ماقسۇت نارىكباەۆ اتىنداعى ۋنيۆەرسيتەتتىڭ بۇرىنعى وقىتۋشىسى يكبولجون كورابوەۆ تىڭشىلىق جاسادى دەگەن ايىپپەن 10 جىلعا باس بوستاندىعىنان ايىرىلدى، دەپ حابارلايدى “ادىرنا”.
“ازاتتىق ازيا” باسىلىمنىڭ مالىمەتىنشە، 46 جاستاعى عالىمعا قاتىستى سوت پروتسەسى ءىس ماتەريالدارىندا قۇپيا اقپاراتتىڭ بولۋىنا بايلانىستى جابىق وتكەن. ونىڭ تۋىستارى ۇكىم تۋرالى رەسمي ورگانداردان ەمەس، ءوز دەرەككوزدەرى ارقىلى بىلگەن.
يكبولجون كورابوەۆ 2026 جىلعى 3 شىلدەدە استانادا ۇستالعان. ول ماقسۇت نارىكباەۆ اتىنداعى ۋنيۆەرسيتەتتە حالىقارالىق قاتىناستار پانىنەن ساباق بەرگەن. عالىمعا قازاقستان قىلمىستىق كودەكسىنىڭ 176-بابى، ياعني «تىڭشىلىق» بويىنشا ايىپ تاعىلعان. اتالعان باپتا 10 جىلدان 15 جىلعا دەيىن باس بوستاندىعىنان ايىرۋ جازاسى كوزدەلگەن.
تۋىستارىنىڭ ايتۋىنشا، عالىمنىڭ قانداي مەملەكەتتىڭ مۇددەسىنە جۇمىس ىستەگەنى جانە سوتتا قانداي دالەلدەر ۇسىنىلعانى تۋرالى وتباسىعا اقپارات بەرىلمەگەن. سونداي-اق ولارعا تەرگەۋ جانە سوت ماتەريالدارىمەن تانىسۋعا، ۇكىمنىڭ كوشىرمەسىن الۋعا مۇمكىندىك جاسالماعان.
كورابوەۆ ايماقتىق ينتەگراتسيا، گەوەكونوميكا جانە ورتالىق ازيانىڭ ستراتەگيالىق ماڭىزى بار مينەرالدىق رەسۋرستارىن زەرتتەگەن. ارىپتەستەرىنىڭ سوزىنشە، ول عىلىمي ەڭبەكتەرىندە اشىق دەرەككوزدەردەگى اقپاراتتى پايدالانعان.
عالىمنىڭ وتباسى قازاقستاننىڭ پرەزيدەنتىنە، باس پروكۋراتۋراعا، ۇلتتىق قاۋىپسىزدىك كوميتەتىنە جانە ومبۋدسمەنگە ءوتىنىش جولداعان. ولار سوت ۇكىمىنە اپەللياتسيالىق شاعىم ءتۇسىرىپ، ءىستى قايتا قاراۋدى، پروفەسسوردىڭ قۇقىقتارى مەن بەدەلىن قالپىنا كەلتىرۋدى تالاپ ەتىپ وتىر.
ازىرگە قازاقستان مەن وزبەكستاننىڭ رەسمي ورگاندارى سوت ۇكىمىنە قاتىستى تۇسىنىكتەمە بەرگەن جوق.
ايتا كەتەيىك، بۇعان دەيىن قازتاگ ۇلتتىق قاۋىپسىزدىك كوميتەتىنىڭ جاۋابىنا سىلتەمە جاساپ، قازاقستان تاراپى كورابوەۆتىڭ ءىسى تۋرالى وزبەكستانعا رەسمي تۇردە حابارلاعانىن جازعان ەدى.
