پرەزيدەنت قاسىم-جومارت توقاەۆتىڭ جولداۋى ەلدە جۇرگىزىلىپ جاتقان رەفورمانىڭ جۇيەلىلىگىن كورسەتىپ، مەملەكەتتىك ساياسات ازاماتتاردىڭ مۇددەسىنە باعىتتالعان ادىلەتتى قازاقستان قۇرۋ مىندەتىن ساقتاپ وتىر.
مەملەكەت باسشىسىنىڭ جولداۋىنداعى نەگىزگى باعىتتارعا پىكىر بىلدىرگەن ساياساتتانۋشى جانەركە قايراتقىزى وسىلاي دەپ مالىمدەدى.
ساراپشىنىڭ پىكىرىنشە، جولداۋدىڭ ماڭىزدى ەرەكشەلىكتىڭ ءبىرى – بۇعان دەيىن بەلگىلەنگەن مىندەتتەردىڭ ساباقتاستىعى. پرەزيدەنت ۇسىنعان جاڭا باستامالار ەل دامۋىنىڭ ستراتەگيالىق باعىتىن وزگەرتپەيدى، كەرىسىنشە، ولار باستالعان رەفورمالاردى ودان ءارى جالعاستىرۋعا باعىتتالعان.
«مەن پرەزيدەنت ساياساتىنىڭ جۇيەلىلىگىن اتاپ وتەر ەدىم. بۇل جۇيەلىلىك جولداۋدان دا ايقىن كورىنەدى. ءبىز بۇعان دەيىن العا قويعان مىندەتتى جۇزەگە اسىرىپ جاتىرمىز. بۇل – ادىلەتتى قازاقستان قۇرۋ. وسى ماقساتقا جەتۋ ءۇشىن قاجەتتى شارالار قابىلدانادى»، – دەدى جانەركە قايراتقىزى.
2026 جىلعى 28 قازانداعى جولداۋىندا مەملەكەت باسشىسى ەل دامۋىنىڭ ۇزاق مەرزىمدى باسىمدىقتارىن تاعى دا ايقىندادى. اتاپ ايتقاندا، ساياسي جانە الەۋمەتتىك-ەكونوميكالىق رەفورمالاردى جالعاستىرۋ، مەملەكەتتىك باسقارۋ جۇيەسىن جەتىلدىرۋ مەن حالىقتىڭ ءال-اۋقاتىن ارتتىرۋ ماسەلەسىنە باسىمدىق بەرىلدى. بۇل رەتتە جۇرگىزىلىپ جاتقان وزگەرىستەردىڭ تۇپكى ناتيجەسى قازاقستاندىقتاردىڭ ءومىر ءسۇرۋ ساپاسىن جاقسارتۋ بولۋى ءتيىس.
ساياساتتانۋشى اتاپ وتكەندەي، مەملەكەتتىك ساياساتتىڭ جۇيەلىلىگى ەرەكشە ماڭىزعا يە. ويتكەنى بۇل رەفورمالاردىڭ بىرىڭعاي باعىتىن ساقتاپ، بۇرىن بەلگىلەنگەن مىندەتتەردى كەزەڭ-كەزەڭىمەن جۇزەگە اسىرۋعا مۇمكىندىك بەرمەك.
«جاعداي وزگەرگەن سايىن العا قويعان مىندەتتى وزگەرتە بەرمەيتىنىمىزدى ءتۇسىنۋ كەرەك. ءبىز ءبىر ماقساتقا – ادىلەتتى قازاقستان قۇرۋعا بەت الىپ بارا جاتىرمىز. مەنىڭ ويىمشا، بۇل ماقسات حالىقتى ۇيىستىرا تۇسەدى»، – دەيدى ساراپشى.
جانەركە قايراتقىزىنىڭ باعالاۋىنشا، مەملەكەت باسشىسىنىڭ جولداۋىنداعى ماڭىزدى باسىمدىقتىڭ ءبىرى – رەفورمالاردىڭ ورتاق باعىتىن ساقتاۋ.
سونىمەن قاتار بەلگىلەنگەن مىندەتتەردى ودان ءارى جۇزەگە اسىرۋ ەلدەگى بارشا ازاماتتىڭ مۇددەسىمەن تىعىز بايلانىستى بولۋى ءتيىس.
