بۇگىن مەملەكەت باسشىسى قاسىم-جومارت توقاەۆ حالىققا جىل سايىنعى جولداۋ كەزىندە ەگەمەندىگىمىز بەن تۇتاستىعىمىزدى بۇزعىسى كەلگەندەر زاڭ بويىنشا جاۋاپقا تارتىلادى، دەپ حابارلايدى "ادىرنا" ۇلتتىق پورتالى.
- ۇلتتىڭ ۇيىسۋى – ودان ءارى دامۋدىڭ باستى فاكتورى. قازىر قازاقستان مۇلدەم جاڭا داۋىرگە قادام باستى. سوعان سايكەس، قوعامدىق ءومىردىڭ بارلىق سالاسى تۇبەگەيلى وزگەرۋدە. جاھاندى تۇراقسىزدىق جايلاپ، كوپتەگەن سىن- قاتەر پايدا بولىپ جاتقان كەزدە ءبىز باعدارىمىزدى بەكەمدەپ، كوزقاراسىمىزدى ايقىنداي ءتۇسۋىمىز قاجەت. بىرلىگىمىز – ءار الۋاندىقتا دەگەن باستى قاعيدامىز ەشقاشان وزگەرمەيدى.
سونىمەن قاتار مەملەكەت باسشىسى قوعامداعى بىرلىك پەن كەلىسىمدى كوزىمىزدىڭ قاراشىعىنداي ساقتاۋ كەرەكتىگىنە توقتالىپ ءوتتى.
- ورىس ءتىلى بۇۇ-داعى رەسمي التى ءتىلدىڭ ءبىرى. سوندىقتان بۇل ماسەلەگە پاراساتتىلىقپەن قاراۋىمىز قاجەت. ەلىمىز وركەنيەتتى ديالوگ پەن ءوزارا سىيلاستىق مادەنيەتىن دارىپتەۋى كەرەك. قازاقستان حالقى اسسامبلەياسىنىڭ بۇل سالاداعى ءرولى ايرىقشا. ءبىز وتانىمىز جانە بارلىق ازاماتىمىز ءۇشىن جاۋاپكەرشىلىكتى سەزىنۋىمىز قاجەت،– دەپ مالىمدەدى قاسىم-جومارت توقاەۆ.
وسىلايشا، "ەگەمەندىگىمىز بەن تۇتاستىعىمىزدىڭ بۇزىلۋىنا جول بەرمەيمىز. قوعامداعى بىرلىك پەن كەلىسىمدى كوزدىڭ قاراشىعىنداي ساقتاۋىمىز كەرەك. ەتنوسارالىق جانە كونفەسسياارالىق قاتىناستىڭ قانشالىقتى ماڭىزدى ەكەنىن بارلىق ازاماتىمىز ءتۇسىنۋى قاجەت. ءبىز قاشاندا الاۋىزدىققا قارسى تۇرا بىلگەن ەلمىز. تىلىنە، ۇلتىنا، ناسىلىنە قاراپ، كەمسىتۋگە، بىرەۋدىڭ نامىسىنا تيۋگە جول بەرمەيمىز. زاڭ بويىنشا جاۋاپقا تارتامىز!»،– دەپ تۇيىندەدى ءسوزىن مەملەكەت باسشىسى.
"ادىرنا" ۇلتتىق پورتالى
