مەملەكەت باسشىسى قاسىم-جومارت توقاەۆ قازاقستاننىڭ ەڭبەك سىڭىرگەن قايراتكەرى، بەلگىلى ءانشى نۇرلان ونەرباەۆتى 65 جاسقا تولعان مەرەيتويىمەن قۇتتىقتادى، دەپ حابارلايدى "ادىرنا" ۇلتتىق پورتالى.
پرەزيدەنت ونەر يەسىنىڭ قازاق مۋزىكاسىن دامىتۋعا جانە ۇلتتىق مادەني مۇرانى ناسيحاتتاۋعا قوسقان ۇلەسىن اتاپ ءوتتى.
پرەزيدەنتتىڭ قۇتتىقتاۋ حاتىن مادەنيەت جانە اقپارات ءمينيسترى ارمان قىرىقباەۆ استانادا وتكەن كەزدەسۋ بارىسىندا انشىگە تابىستادى.
قۇتتىقتاۋ حاتىندا مەملەكەت باسشىسى نۇرلان ونەرباەۆتىڭ وزىندىك ورىنداۋشىلىق مانەرى مەن قوڭىر داۋىسى تىڭدارماننىڭ ىقىلاسىنا بولەنگەنىن اتاپ وتكەن.
«وزىڭىزگە ءتان قوڭىر داۋىسىڭىز بەن ەرەكشە ورىنداۋشىلىق مانەرىڭىز تالعامپاز تىڭدارماننىڭ جۇرەگىنەن ورىن الدى. ءسىز ءداستۇر ساباقتاستىعىن ساقتاپ، حالىق اندەرى مەن بەلگىلى كومپوزيتورلاردىڭ تاڭداۋلى تۋىندىلارىن ناسيحاتتاۋعا مول ۇلەس قوسىپ كەلەسىز. ىزدەنىسكە تولى شىعارماشىلىق جولىڭىز جەمىستى بولىپ، تالانتتى شاكىرتتەر تاربيەلەدىڭىز»، – دەلىنگەن پرەزيدەنتتىڭ قۇتتىقتاۋىندا.
سونداي-اق قاسىم-جومارت توقاەۆ ءانشىنىڭ ۇلتتىق ونەردى دارىپتەۋ مەن جاس تالانتتاردى تاربيەلەۋ جولىنداعى ەڭبەگىنە جوعارى باعا بەردى.
مەملەكەت باسشىسى مەرەيتوي يەسىنە زور دەنساۋلىق، وتباسىنا اماندىق پەن باق-بەرەكە تىلەپ، ەلىمىزدىڭ رۋحاني-مادەني مۇراسىن بايىتۋ جولىنداعى شىعارماشىلىق قىزمەتىنە تابىس تىلەدى.
