قازاقستاندىق كرەاتور مىرزاحان جۇماحان Astana AI Film Festival (AAIFF 2026) حالىقارالىق فەستيۆالىندە Best Character – «ۇزدىك كەيىپكەر» نوميناتسياسىنىڭ جەڭىمپازى اتاندى. ول بايقاۋعا ۇسىنعان It Was Just a Joke قىسقامەتراجدى ءفيلمى ارقىلى قازىلار القاسىنىڭ جوعارى باعاسىنا يە بولدى، دەپ حابارلايدى "ادىرنا" ۇلتتىق پورتالى Tengrinews سايتىنا سىلتەپ.
3 قازاندا استانادا اياقتالعان AAIFF 2026 فەستيۆالىنە الەمنىڭ 125 ەلىنەن 8067 ءوتىنىم تۇسكەن. سونىڭ ىشىنەن رەسمي كوميسسيا 25 جۇمىستى فينالدىق باعدارلاماعا ىرىكتەگەن. فەستيۆالدىڭ جالپى جۇلدە قورى 2 ميلليون دوللاردى قۇرادى.
«It Was Just a Joke» ءفيلمى نە تۋرالى؟
مىرزاحان جۇماحاننىڭ قىسقامەتراجدى ءفيلمى قاراپايىم تۇرمىستىق جاعدايدان باستالىپ، بىرتىندەپ ابسۋردقا ۇلاساتىن كومەديالىق وقيعاعا قۇرىلعان.
سيۋجەت بويىنشا ءۇي يەسى ىسساپارعا كەتىپ، ءۇي جانۋارىن اعاسىنا قالدىرادى. اعاسى يتپەن قالجىڭداماق بولىپ، ونى تاۋىق ەتىنىڭ ءبىر بولىگىمەن ادەيى قىزىقتىرادى. الايدا جازىقسىز ءازىل بىرتىندەپ ەكەۋىنىڭ اراسىنداعى ناعىز «شايقاسقا» اينالادى.
وقيعا وربىگەن سايىن جاعدايدىڭ ەسسىزدىك دەڭگەيى دە ارتا تۇسەدى. ءتىپتى ءبىر ساتتە يت كوگال شاپقىشپەن شابۋىلعا شىعادى.
«اقىرىندا بۇل كىشكەنتاي ءارى جازىقسىز ءازىل ەكەۋىنىڭ اراسىنداعى ناعىز شايقاسقا اينالادى»، – دەيدى مىرزاحان جۇماحان.
اۆتوردىڭ ايتۋىنشا، ءفيلمنىڭ كومەديالىق باعىتتا بولۋى كەزدەيسوق ەمەس. جوباسىن ازىرلەمەس بۇرىن ول AI ارقىلى جاسالعان كوپتەگەن فيلمدەر مەن روليكتەردى قاراپ، نارىقتاعى نەگىزگى ۇردىستەردى زەرتتەگەن.
ونىڭ بايقاۋىنشا، جاساندى ينتەللەكت كومەگىمەن كينو جاسايتىن كرەاتورلاردىڭ باسىم بولىگى فيلوسوفيالىق تاقىرىپتارعا، عىلىمي فانتاستيكاعا جانە كۇردەلى ۆيزۋالدى شەشىمدەرگە باسىمدىق بەرەدى. ال قاراپايىم ادامدىق ەموتسيالار مەن جەڭىل يۋمور سالىستىرمالى تۇردە از كەزدەسەدى.
ء«وز جۇمىسىمدى جاساماس بۇرىن YouTube-تا كوپتەگەن ءتۇرلى روليكتەر كوردىم. كۇردەلى ماعىناسى بار، وتە تاپقىر جۇمىستار كوپ بولدى. كوپتەگەن كرەاتور قاراپايىم كينوستۋديالاردا ۇلكەن بيۋدجەتسىز ءتۇسىرۋ مۇمكىن ەمەس دۇنيەلەرگە – فانتاستيكاعا، كۇردەلى انيماتسياعا باسىمدىق بەرەدى. مەن ادامدارعا جەڭىل كومەديا جەتىسپەيدى دەپ ويلادىم. سوندىقتان ادەيى بارىنشا قاراپايىم، بىراق سونىمەن بىرگە بارىنشا “كۇلكىلى” باعىتتى تاڭدادىم»، – دەيدى جەڭىمپاز.
جەڭىس تۋرالى جاڭالىقتى ەستىگەن ساتتە مىرزاحان جۇماحاننىڭ ءوزى دە نە بولعانىن بىردەن تۇسىنە الماعان.
اۆتوردىڭ ايتۋىنشا، ساحنادان ءوز ەسىمىن ەستىگەندە ول قاتتى ابدىراپ قالعان.
«مەن تولىقتاي ابدىراپ، شوك كۇيىندە بولدىم. نە ىستەۋ كەرەگىن بىردەن تۇسىنبەدىم. بۇل – سوزبەن ايتىپ جەتكىزگىسىز قۋانىش»، – دەپ ەسكە الادى ول.
جەڭىسكە جەتۋ وڭاي بولماعان. سەبەبى فەستيۆالگە جەكە كرەاتورلارمەن قاتار، ۇلكەن تاجىريبەسى، قارجىسى جانە كاسىبي كوماندالارى بار ستۋديالار دا قاتىستى.
ال مىرزاحان ءفيلمىن تولىعىمەن جالعىز ءوزى جاساعان.
«ارينە، قوبالجۋ بولدى. بايقاۋعا ارتىندا ۇلكەن تاجىريبەسى، قوماقتى بيۋدجەتى جانە تۇتاس كوماندالارى بار كوپتەگەن ادام قاتىستى. ال مەن جالعىز بولدىم، قولىمدا يدەيامنان باسقا ەشتەڭە بولعان جوق»، – دەيدى كرەاتور.
ول فەستيۆال تۋرالى Instagram جەلىسىنەن كەزدەيسوق بىلگەن. ناۋرىز ايىندا باسقا ءبىر بايقاۋدا 10 مىڭ دوللار ۇتىپ الىپ، دەمالىپ جۇرگەن كەزىندە جۇلدە قورى قوماقتى جاڭا فەستيۆالدىڭ انونسىنا كوزى تۇسكەن.
مىرزاحان جۇماحان AI الەمىنە بىردەن كەلگەن جوق. بۇعان دەيىن ول وپەراتور بولىپ جۇمىس ىستەپ، كادىمگى كامەرامەن جارنامالىق روليكتەر مەن ونلاين كۋرستار تۇسىرگەن.
قازىر كرەاتور كاسىبي باعىتىن تولىعىمەن جاساندى ينتەللەكت تەحنولوگيالارىمەن بايلانىستىرىپ وتىر. ونىڭ ايتۋىنشا، بۇل سالادا ءارى قاراي دامىپ، جاڭا جوبالار جاساۋدى جوسپارلايدى.
جەڭىستەن كەيىن مىرزاحاندى دوستارى، ارىپتەستەرى مەن تۋىستارى قۇتتىقتاپ جاتىر. ولار بايقاۋدىڭ بارلىق كەزەڭىندە كرەاتورعا قولداۋ كورسەتىپ، ونىڭ جوباسىنا جانكۇيەر بولعان.
مىرزاحان جەڭىپ العان جۇلدە اقشاسىن بىردەن تۇرمىستىق قاجەتتىلىكتەرگە نەمەسە قىمبات زاتتارعا جۇمساۋدى جوسپارلامايدى.
«ازىرگە ناقتى بىلمەيمىن، بىراق اقشانى جاي عانا زاتتارعا جۇمساعىم كەلمەيدى. بۇل قاراجاتتى وزىمە، بىلىمىمە ينۆەستيتسيالاعاندى ءجون كورەمىن: جاڭا ءارى وزىق كۋرستار ساتىپ الىپ، ءارى قاراي دامىعىم كەلەدى»، – دەيدى ول.
