Qazaqstandyq kreator Myrzahan Jūmahan Astana AI Film Festival (AAIFF 2026) halyqaralyq festivalınde Best Character – «Üzdık keiıpker» nominasiiasynyŋ jeŋımpazy atandy. Ol baiqauǧa ūsynǧan It Was Just a Joke qysqametrajdy filmı arqyly qazylar alqasynyŋ joǧary baǧasyna ie boldy, dep habarlaidy "Adyrna" ūlttyq portaly Tengrinews saityna sıltep.
3 qazanda Astanada aiaqtalǧan AAIFF 2026 festivalıne älemnıŋ 125 elınen 8067 ötınım tüsken. Sonyŋ ışınen resmi komissiia 25 jūmysty finaldyq baǧdarlamaǧa ırıktegen. Festivaldıŋ jalpy jülde qory 2 million dollardy qūrady.
«It Was Just a Joke» filmı ne turaly?
Myrzahan Jūmahannyŋ qysqametrajdy filmı qarapaiym tūrmystyq jaǧdaidan bastalyp, bırtındep absurdqa ūlasatyn komediialyq oqiǧaǧa qūrylǧan.
Siujet boiynşa üi iesı ıssaparǧa ketıp, üi januaryn aǧasyna qaldyrady. Aǧasy itpen qaljyŋdamaq bolyp, ony tauyq etınıŋ bır bölıgımen ädeiı qyzyqtyrady. Alaida jazyqsyz äzıl bırtındep ekeuınıŋ arasyndaǧy naǧyz «şaiqasqa» ainalady.
Oqiǧa örbıgen saiyn jaǧdaidyŋ essızdık deŋgeiı de arta tüsedı. Tıptı bır sätte it kögal şapqyşpen şabuylǧa şyǧady.
«Aqyrynda būl kışkentai ärı jazyqsyz äzıl ekeuınıŋ arasyndaǧy naǧyz şaiqasqa ainalady», – deidı Myrzahan Jūmahan.
Avtordyŋ aituynşa, filmnıŋ komediialyq baǧytta boluy kezdeisoq emes. Jobasyn äzırlemes būryn ol AI arqyly jasalǧan köptegen filmder men rolikterdı qarap, naryqtaǧy negızgı ürdısterdı zerttegen.
Onyŋ baiqauynşa, jasandy intellekt kömegımen kino jasaityn kreatorlardyŋ basym bölıgı filosofiialyq taqyryptarǧa, ǧylymi fantastikaǧa jäne kürdelı vizualdy şeşımderge basymdyq beredı. Al qarapaiym adamdyq emosiialar men jeŋıl iumor salystyrmaly türde az kezdesedı.
«Öz jūmysymdy jasamas būryn YouTube-ta köptegen türlı rolikter kördım. Kürdelı maǧynasy bar, öte tapqyr jūmystar köp boldy. Köptegen kreator qarapaiym kinostudiialarda ülken biudjetsız tüsıru mümkın emes dünielerge – fantastikaǧa, kürdelı animasiiaǧa basymdyq beredı. Men adamdarǧa jeŋıl komediia jetıspeidı dep oiladym. Sondyqtan ädeiı barynşa qarapaiym, bıraq sonymen bırge barynşa “külkılı” baǧytty taŋdadym», – deidı jeŋımpaz.
Jeŋıs turaly jaŋalyqty estıgen sätte Myrzahan Jūmahannyŋ özı de ne bolǧanyn bırden tüsıne almaǧan.
Avtordyŋ aituynşa, sahnadan öz esımın estıgende ol qatty abdyrap qalǧan.
«Men tolyqtai abdyrap, şok küiınde boldym. Ne ısteu keregın bırden tüsınbedım. Būl – sözben aityp jetkızgısız quanyş», – dep eske alady ol.
Jeŋıske jetu oŋai bolmaǧan. Sebebı festivalge jeke kreatorlarmen qatar, ülken täjıribesı, qarjysy jäne käsıbi komandalary bar studiialar da qatysty.
Al Myrzahan filmın tolyǧymen jalǧyz özı jasaǧan.
«Ärine, qobalju boldy. Baiqauǧa artynda ülken täjıribesı, qomaqty biudjetı jäne tūtas komandalary bar köptegen adam qatysty. Al men jalǧyz boldym, qolymda ideiamnan basqa eşteŋe bolǧan joq», – deidı kreator.
Ol festival turaly Instagram jelısınen kezdeisoq bılgen. Nauryz aiynda basqa bır baiqauda 10 myŋ dollar ūtyp alyp, demalyp jürgen kezınde jülde qory qomaqty jaŋa festivaldıŋ anonsyna közı tüsken.
Myrzahan Jūmahan AI älemıne bırden kelgen joq. Būǧan deiın ol operator bolyp jūmys ıstep, kädımgı kameramen jarnamalyq rolikter men onlain kurstar tüsırgen.
Qazır kreator käsıbi baǧytyn tolyǧymen jasandy intellekt tehnologiialarymen bailanystyryp otyr. Onyŋ aituynşa, būl salada ärı qarai damyp, jaŋa jobalar jasaudy josparlaidy.
Jeŋısten keiın Myrzahandy dostary, ärıptesterı men tuystary qūttyqtap jatyr. Olar baiqaudyŋ barlyq kezeŋınde kreatorǧa qoldau körsetıp, onyŋ jobasyna janküier bolǧan.
Myrzahan jeŋıp alǧan jülde aqşasyn bırden tūrmystyq qajettılıkterge nemese qymbat zattarǧa jūmsaudy josparlamaidy.
«Äzırge naqty bılmeimın, bıraq aqşany jai ǧana zattarǧa jūmsaǧym kelmeidı. Būl qarajatty özıme, bılımıme investisiialaǧandy jön köremın: jaŋa ärı ozyq kurstar satyp alyp, ärı qarai damyǧym keledı», – deidı ol.
