Qūrmanǧazy atyndaǧy Qazaq ūlttyq halyq aspaptar orkestrı «Älem tanyǧan äsem top» atty küi keşın ūsynady. Konserttık baǧdarlama qazaqtyŋ dästürlı küişılık mektebınıŋ körnektı ökılderı – Mahambet Bökeihanov, Lūqpan Mūhitov jäne Qambar Medetovtıŋ şyǧarmaşylyq mūrasyna arnalǧan.
1934 jyly negızı qalanǧan Qūrmanǧazy ūlttyq orkestrınıŋ qalyptasu joly osyndai dara daryndardyŋ şyǧarmaşylyq eŋbegımen tyǧyz bailanysty. Qazaqtyŋ dästürlı oryndauşylyq önerın käsıbi orkestrlık deŋgeige köteru baǧytynda akademik Ahmet Jūbanovpen qatar, Mahambet Bökeihanov, Lūqpan Mūhitov jäne Qambar Medetovtıŋ atqarǧan qyzmetı erekşe.
KÖRNEKTI TŪLǦALARDYŊ ǦŪMYR JOLY
Mahambet Bökeihanov – qazaqtyŋ küi mūrasyn jinaqtap, saqtap, keiıngı ūrpaqqa jetkızgen körnektı küişı-kompozitor. Ol Qūrmanǧazy, Däuletkerei, Älıkei, Seitek syndy halyq kompozitorlarynyŋ şyǧarmalaryn keŋınen nasihattady. Belgılı muzyka zertteuşısı Aleksandr Zataevich onyŋ oryndauynan «Baijūma», «Būlbūl», «Oibai, balam», «Joşy», «Şora» jäne basqa da 28 küidı notaǧa tüsırgen. Mahambet Bökeihanov ūlttyq muzykalyq aspaptardy jetıldırıp, alǧaşqy halyq aspaptar orkestrın ūiymdastyruǧa zor üles qosty.
Lūqpan Mūhitov – dästürlı küişılık önerdıŋ sabaqtastyǧyn saqtaǧan şeber oryndauşy, ūlaǧatty ūstaz. Halyq kompozitory Mūhit Meralyūlynyŋ nemeresı retınde ol jastaiynan ūlttyq muzyka dästürımen susyndap, Qūrmanǧazy men özge de halyq küişılerınıŋ şyǧarmalaryn tereŋ meŋgerdı. 1934 jyldan bastap orkestrde dombyraşy-konsertmeister bolyp eŋbek etıp, qazaqtyŋ aspaptyq muzykasyn käsıbi sahnada tanytuǧa atsalysty. Sonymen qatar Almaty memlekettık konservatoriiasynda ūstazdyq etıp, Nūrǧisa Tılendiev bastaǧan talantty şäkırtterdı tärbieledı.
Qambar Medetov – dombyra oryndauşylyǧynyŋ özındık mektebın qalyptastyrǧan körnektı küişı, ūlttyq orkestr önerınıŋ bastauynda tūrǧan qairatkerlerdıŋ bırı. Onyŋ küi tartudaǧy erekşe tehnikasy men oryndauşylyq mänerı zamandastarynyŋ joǧary baǧasyna ie boldy. Akademik Ahmet Jūbanov Qambar Medetovtıŋ sausaq basu şeberlıgın özgelerden daralap, onyŋ oryndauşylyq qoltaŋbasyna airyqşa baǧa bergen. Küişı el ışındegı daryndy önerpazdardy Almatyǧa jinap, käsıbi muzykalyq ūjymnyŋ qalyptasuyna belsene atsalysty.
«Älem tanyǧan äsem top» konsertı – talantqa taǧzym, ūlttyq önerdıŋ bügıngı tynysy men bolaşaǧyna arnalǧan taǧylymdy mädeni joba. Küi keşınde körermen qazaq halqynyŋ küişılık mektepterınıŋ körkemdık erekşelıgın, oryndauşylyq dästürın jäne ūlttyq muzykanyŋ tereŋ filosofiialyq mazmūnyn sezıne alady.
