Şymkentte «Täuelsız eldıŋ bolaşaǧy – jastar» atty merekelık konsert öttı

Bügın Şymkent qalasynyŋ Dostyq üiınde Qazaqstan Respublikasynyŋ Täuelsızdık künıne orai qalalyq Assambleia jastarynyŋ ūiymdastyruymen «Täuelsız eldıŋ bolaşaǧy – jastar» atty merekelık konserttık baǧdarlama öttı. Is-şaraǧa Şymkent qalasynyŋ ışkı saiasat basqarmasynyŋ «Qoǧamdyq kelısım» KMM basşysy Nūrken Älımqūlov, qalalyq etnomädeni bırlestıkterdıŋ töraǧalary men belsendılerı, sondai-aq qala tūrǧyndary qatysty.

Konserttıŋ negızgı maqsaty – jastardyŋ şyǧarmaşylyq äleuetın därıpteu, ūlttyq mädeni mūrany nasihattau jäne ūrpaq sabaqtastyǧyn nyǧaitu. Baǧdarlama şeŋberınde jastardyŋ täuelsız elımızdıŋ damuyna qosqan ülesı körsetılıp, öner arqyly patriottyq sezımdı qalyptastyruǧa erekşe nazar audaryldy.

Is-şara «Ūrpaq sabaqtastyǧy – Täuelsızdık kepılı» atty poetikalyq-horegrafiialyq kompozisiiamen aşyldy. Sahnada student-jastar elımızdıŋ örkendeu joly men jetıstıkterın beineledı, al «Şamsinur» bi ansamblı «Mereke» biın oryndap, körermenderge köterıŋkı köŋıl-küi syilady.

Şymkent qalasynyŋ «Qoǧamdyq kelısım» KMM basşysy Nūrken Älımqūlov söz söilep «Bügıngı şara – jastarymyzdyŋ şyǧarmaşylyǧyn körsetu men ūrpaq sabaqtastyǧyn nyǧaituǧa arnalǧan maŋyzdy ıs-şara. Bız jastarǧa senemız jäne olardyŋ täuelsız elımızdıŋ damuyna qosqan ülesı zor dep sanaimyz. Bızdıŋ mındetımız – jas buynǧa dūrys baǧyt beru, olardyŋ şyǧarmaşylyq qabıletın damytyp, patriottyq tärbie beruge mümkındık jasau. Būl tek mädeni ıs-şara emes, sonymen qatar, täuelsızdıktıŋ mänın tüsındıru, jastardy elge qyzmet etuge baulu maqsatyndaǧy maŋyzdy bastama» – dedı.

Konsert barysynda är türlı janr men baǧyttaǧy şyǧarmalar körermen nazaryna ūsynyldy. Ö.Jänıbekov atyndaǧy OQMPU studentterı «Sän» teatrynyŋ defile körsetılımın ötkızdı. Sonymen qatar, respublikalyq baiqaulardyŋ laureaty İzatullaeva Zardiana ekı än oryndasa, Ürker tobynyŋ repertuarynan «Janym» änın respublikalyq baiqaulardyŋ laureaty Oleg Vimenko jetkızdı.

Is-şara finalynda «Qazaqstan – elım menıŋ» änı şyrqalyp, sahnadaǧy barlyq oryndauşylar men jalauşalar körermendermen bırge änge qosyldy.

Aita keteiık, «Assambleia jastary» qoǧamdyq bırlestıgınıŋ negızgı mındetı – Qazaqstan halqynyŋ qoǧamdyq kelısımı men jalpyūlttyq bırlıgı negızınde jastardy damytu jäne toptastyru, Qazaqstan halqy Assambleiasy qyzmetı aiasynda jastar bastamalaryn qoldau jäne äleumettık belsendılıgın damytu, mädeni-aǧartuşylyq qyzmettı jüzege asyru, jastar arasynda qoǧamdyq kelısımdı qalyptastyruǧa järdemdesu, jastardyŋ demokratiialyq normalarǧa süienetın saiasi-qūqyqtyq mädenietın qalyptastyru, etnos jastaryn memlekettık tıldı üirenuge, ony tanymal etu jäne etnosaralyq qatynas tılı retınde ılgerıletu prosesıne tartu, patriottyq baǧyttaǧy qoǧamdyq-saiasi ıs-şaralardy, etnosaralyq jäne mädenietaralyq dialogty ötkızuge etnomädeni jäne özge de bırlestıkterdıŋ jastaryn tartu, jastar arasynda volonterlık pen qaiyrymdylyq qyzmettı damytuǧa qoldau körsetu.