Қазақстандық креатор Мырзахан Жұмахан Astana AI Film Festival (AAIFF 2026) халықаралық фестивалінде Best Character – «Үздік кейіпкер» номинациясының жеңімпазы атанды. Ол байқауға ұсынған It Was Just a Joke қысқаметражды фильмі арқылы қазылар алқасының жоғары бағасына ие болды, деп хабарлайды "Адырна" ұлттық порталы Tengrinews сайтына сілтеп.
3 қазанда Астанада аяқталған AAIFF 2026 фестиваліне әлемнің 125 елінен 8067 өтінім түскен. Соның ішінен ресми комиссия 25 жұмысты финалдық бағдарламаға іріктеген. Фестивальдің жалпы жүлде қоры 2 миллион долларды құрады.
«It Was Just a Joke» фильмі не туралы?
Мырзахан Жұмаханның қысқаметражды фильмі қарапайым тұрмыстық жағдайдан басталып, біртіндеп абсурдқа ұласатын комедиялық оқиғаға құрылған.
Сюжет бойынша үй иесі іссапарға кетіп, үй жануарын ағасына қалдырады. Ағасы итпен қалжыңдамақ болып, оны тауық етінің бір бөлігімен әдейі қызықтырады. Алайда жазықсыз әзіл біртіндеп екеуінің арасындағы нағыз «шайқасқа» айналады.
Оқиға өрбіген сайын жағдайдың ессіздік деңгейі де арта түседі. Тіпті бір сәтте ит көгал шапқышпен шабуылға шығады.
«Ақырында бұл кішкентай әрі жазықсыз әзіл екеуінің арасындағы нағыз шайқасқа айналады», – дейді Мырзахан Жұмахан.
Автордың айтуынша, фильмнің комедиялық бағытта болуы кездейсоқ емес. Жобасын әзірлемес бұрын ол AI арқылы жасалған көптеген фильмдер мен роликтерді қарап, нарықтағы негізгі үрдістерді зерттеген.
Оның байқауынша, жасанды интеллект көмегімен кино жасайтын креаторлардың басым бөлігі философиялық тақырыптарға, ғылыми фантастикаға және күрделі визуалды шешімдерге басымдық береді. Ал қарапайым адамдық эмоциялар мен жеңіл юмор салыстырмалы түрде аз кездеседі.
«Өз жұмысымды жасамас бұрын YouTube-та көптеген түрлі роликтер көрдім. Күрделі мағынасы бар, өте тапқыр жұмыстар көп болды. Көптеген креатор қарапайым киностудияларда үлкен бюджетсіз түсіру мүмкін емес дүниелерге – фантастикаға, күрделі анимацияға басымдық береді. Мен адамдарға жеңіл комедия жетіспейді деп ойладым. Сондықтан әдейі барынша қарапайым, бірақ сонымен бірге барынша “күлкілі” бағытты таңдадым», – дейді жеңімпаз.
Жеңіс туралы жаңалықты естіген сәтте Мырзахан Жұмаханның өзі де не болғанын бірден түсіне алмаған.
Автордың айтуынша, сахнадан өз есімін естігенде ол қатты абдырап қалған.
«Мен толықтай абдырап, шок күйінде болдым. Не істеу керегін бірден түсінбедім. Бұл – сөзбен айтып жеткізгісіз қуаныш», – деп еске алады ол.
Жеңіске жету оңай болмаған. Себебі фестивальге жеке креаторлармен қатар, үлкен тәжірибесі, қаржысы және кәсіби командалары бар студиялар да қатысты.
Ал Мырзахан фильмін толығымен жалғыз өзі жасаған.
«Әрине, қобалжу болды. Байқауға артында үлкен тәжірибесі, қомақты бюджеті және тұтас командалары бар көптеген адам қатысты. Ал мен жалғыз болдым, қолымда идеямнан басқа ештеңе болған жоқ», – дейді креатор.
Ол фестиваль туралы Instagram желісінен кездейсоқ білген. Наурыз айында басқа бір байқауда 10 мың доллар ұтып алып, демалып жүрген кезінде жүлде қоры қомақты жаңа фестивальдің анонсына көзі түскен.
Мырзахан Жұмахан AI әлеміне бірден келген жоқ. Бұған дейін ол оператор болып жұмыс істеп, кәдімгі камерамен жарнамалық роликтер мен онлайн курстар түсірген.
Қазір креатор кәсіби бағытын толығымен жасанды интеллект технологияларымен байланыстырып отыр. Оның айтуынша, бұл салада әрі қарай дамып, жаңа жобалар жасауды жоспарлайды.
Жеңістен кейін Мырзаханды достары, әріптестері мен туыстары құттықтап жатыр. Олар байқаудың барлық кезеңінде креаторға қолдау көрсетіп, оның жобасына жанкүйер болған.
Мырзахан жеңіп алған жүлде ақшасын бірден тұрмыстық қажеттіліктерге немесе қымбат заттарға жұмсауды жоспарламайды.
«Әзірге нақты білмеймін, бірақ ақшаны жай ғана заттарға жұмсағым келмейді. Бұл қаражатты өзіме, біліміме инвестициялағанды жөн көремін: жаңа әрі озық курстар сатып алып, әрі қарай дамығым келеді», – дейді ол.
