2026 جىلعى 3–4 قازاندا موڭعوليانىڭ بايان-ولگي ايماعىنا قاراستى بۇلعىن سۇمىنىڭ سايات الاڭىندا ءداستۇرلى 27-ءشى حالىقارالىق «التىن بۇركىت» فەستيۆالى ءوتتى. قازاقتىڭ ەجەلگى ساياتشىلىق ونەرىن دارىپتەيتىن ايتۋلى شاراعا مىڭداعان كورەرمەن مەن الەمنىڭ تۇكپىر-تۇكپىرىنەن كەلگەن تۋريستەر قاتىستى، دەپ حابارايدى «ادىرنا» ءتىلشىسى.
فەستيۆال اياسىندا بۇركىتشىلەر قىران قۇستاردى باپتاۋ مەن اڭشىلىق شەبەرلىگىن پاش ەتىپ، ءوزارا باق سىنادى. سونىمەن قاتار ۇلتتىق مادەني قويىلىمدار كورسەتىلىپ، قازاقتىڭ ءداستۇرلى «قىز قۋ»، «كوكپار» ويىندارى ۇيىمداستىرىلدى. قولونەرشىلەر كورمەسى دە كەلۋشىلەردىڭ ەرەكشە قىزىعۋشىلىعىن تۋدىردى.
ۇيىمداستىرۋشىلاردىڭ ءبىرى بەكبولات بۇعىبايۇلىنىڭ ايتۋىنشا، بيىلعى مەرەكەگە قاتىسۋ ءۇشىن سەكسەنگە جۋىق بۇركىتشى الدىن الا تىركەلگەن. جولدا كەلە جاتقان ساياتشىلاردى قوسا ەسەپتەگەندە، سايىسقا 90-عا جۋىق بۇركىتشى قاتىسقان.
«حالقىمىزدىڭ ساياتشىلىق ءداستۇرىن الەمگە تانىتۋ باعىتىندا اۋقىمدى جۇمىستار جۇرگىزىلىپ جاتىر. ولگەي قالاسىندا اشىلعان بۇركىتشىلەر سارايى ۇلتتىق مۇرانى ناسيحاتتاۋعا ۇلەس قوسۋدا. وتكەن جىلى فەستيۆالگە 600-گە جۋىق شەتەلدىك تۋريست كەلسە، بيىل دا 600–700 تۋريست كەلگەنى تۋرالى اقپارات بار»،– دەدى ول.
«التىن بۇركىت» – موڭعوليا قازاقتارىنىڭ اتادان بالاعا جالعاسقان اڭشىلىق ونەرىن، ۇلتتىق ويىندارى مەن سالت-ءداستۇرىن ناسيحاتتايتىن ەڭ ءىرى مادەني شارالاردىڭ ءبىرى. مامانداردىڭ ايتۋىنشا، بۇركىتپەن اڭ اۋلاۋ ءداستۇرىنىڭ تاريحى شامامەن 6000 جىلعا سوزىلادى. بۇل كونە ونەردى بۇگىنگى كۇنگە دەيىن ساقتاپ كەلگەن حالىقتاردىڭ ءبىرى – موڭعوليا قازاقتارى.
سوڭعى جىلدارى فەستيۆالگە دەگەن قىزىعۋشىلىقتىڭ ارتۋىنا بايلانىستى موڭعوليادا فەستيۆال جىلىنا ەكى رەت وتكىزىلەتىن دەڭگەيگە جەتكەن. بۇل ۇلتتىق مۇرانى حالىقارالىق دەڭگەيدە تانىتىپ، ەلدىڭ تۋريستىك الەۋەتىن ارتتىرۋعا ىقپال ەتىپ وتىر.
سۋرەت: Sputnik.kz
