«دارىن» مەملەكەتتىك جاستار سىيلىعىن بەرۋ جونىندەگى كونكۋرستىق كوميسسيانىڭ قورىتىندى وتىرىسى ءوتتى. جيىنعا قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ قاتىستى.
بيىل سىيلىققا 504 ءوتىنىم ءتۇستى. الدىن الا تەكسەرۋ قورىتىندىسىندا ونىڭ 429-ى كونكۋرستىق كوميسسيانىڭ قاراۋىنا جىبەرىلدى.
ىرىكتەۋ 10 اتالىم بويىنشا جۇرگىزىلەدى. ەڭ كوپ ءوتىنىم «عىلىم» – 119 جانە «قوعامدىق قىزمەت» – 75 اتالىمدارى بويىنشا قابىلداندى. «تەاتر جانە كينو» اتالىمىنا – 58, «حالىق شىعارماشىلىعى» – 43, «كلاسسيكالىق مۋزىكا» – 30, «ادەبيەت» – 23, «ەسترادا» جانە «ديزاين جانە بەينەلەۋ ونەرى» اتالىمدارىنىڭ ارقايسىسىنا 22, «سپورت» – 20, «جۋرناليستيكا» اتالىمىنا 17 ءوتىنىم ءتۇستى.
كوميسسيا قۇرامىندا قۇرىلتاي دەپۋتاتتارى، ورتالىق مەملەكەتتىك ورگانداردىڭ وكىلدەرى، عالىمدار، مادەنيەت جانە ونەر قايراتكەرلەرى، قوعام قايراتكەرلەرى، قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەستىڭ مۇشەلەرى، كاسىپكەرلەر جانە پرەزيدەنتتىك جاستار كادر رەزەرۆىنىڭ وكىلدەرى بار.
ىرىكتەۋ ەكى كەزەڭنەن تۇردى. 27-29 قازان ارالىعىندا ءتيىستى باعىتتار بويىنشا التى سەكتسيالىق وتىرىس ءوتتى. جيىن قورىتىندىسى نەگىزىندە كوميسسيانىڭ قورىتىندى وتىرىسىنا ۇسىنىستار ازىرلەندى.
كوميسسيا جۇمىسىنىڭ ناتيجەسىندە ون نوميناتسيانىڭ ارقايسىسى بويىنشا ەكى ادامنان بارلىعى 20 ۇمىتكەر انىقتالدى.
مادەنيەت جانە اقپارات ءمينيسترى ارمان قىرىقباەۆ كوميسسيا مۇشەلەرىنە اتقارعان جۇمىسى ءۇشىن العىس ءبىلدىردى. مينيستر ۇمىتكەرلەردى ءادىل ءارى جان-جاقتى باعالاۋدىڭ، ەلىمىزدەگى تالانتتى، باستاماشىل جاستاردى قولداۋدىڭ ماڭىزىن اتاپ ءوتتى.
«دارىن» مەملەكەتتىك جاستار سىيلىعىنىڭ يەگەرلەرىن ماراپاتتاۋ ءراسىمى 26 قاراشادا وتەدى.
«دارىن» مەملەكەتتىك جاستار سىيلىعى عىلىمدا، شىعارماشىلىقتا، قوعامدىق قىزمەت پەن سپورتتا ەلەۋلى جەتىستىككە جەتكەن تالانتتى جاستاردى قولداۋ ماقساتىندا 1992 جىلى تاعايىندالعان. وسى ۋاقىتتان بەرى ءتۇرلى سالادا ەڭبەك ەتەتىن 400-گە جۋىق ادام سىيلىق يەگەرى اتاندى.
