رەسپۋبليكا كۇنى قارساڭىندا استانادا شاكەن ايمانوۆ اتىنداعى «قازاقفيلم» كينوستۋدياسى مەن ۇلتتىق كينونى قولداۋ مەملەكەتتىك ورتالىعىنىڭ جانە قر مادەنيەت جانە اقپارات مينيسترلىگىنىڭ قولداۋىمەن تۇسىرىلگەن «كاپيتان بايتاسوۆ» ءفيلمى تانىستىرىلدى.
ءفيلمنىڭ تۇساۋكەسەرىنە قر مادەنيەت جانە اقپارات ءمينيسترى ايدا بالاەۆا، قر پارلامەنتى دەپۋتاتتارى، قۇقىق قورعاۋ ورگاندارىنىڭ وكىلدەرى، مادەنيەت قايراتكەرلەرى، اكتەرلەر مەن تۋىندىنىڭ شىعارماشىلىق توبى، سونداي-اق باتىردىڭ وتباسى – جۇبايى گۇلجامال تاجيەۆا مەن ۇلى ارمانجان قاتىستى.
كينونىڭ كورسەتىلىمى الدىندا قر پارلامەنتى سەناتىنىڭ دەپۋتاتى نۇرتورە ءجۇسىپ قر پارلامەنتى سەناتىنىڭ توراعاسى ماۋلەن اشىمباەۆتىڭ قۇتتىقتاۋ حاتىن وقىپ بەردى.
«مەملەكەت باسشىسى قاسىم-جومارت كەمەلۇلى توقاەۆ بيىل قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ەرجۇرەك ساقشىلاردىڭ ەرلىگى حالىققا جانقيارلىقپەن قىزمەت ەتۋدىڭ ۇلگىسى رەتىندە جۇرتىمىزدىڭ جادىندا ساقتالۋعا ءتيىس ەكەنىن ايتتى. وسى تۇرعىدان كەلگەندە، قالىڭ كورەرمەنگە جول تارتقان جاڭا ءفيلمدى بۇل باعىتتاعى ىرگەلى ىستەردىڭ جارقىن كورىنىسى دەپ قابىلدايمىز. عازيز بايتاسوۆ – قىسقا عۇمىرىندا قىلمىسقا قارسى كۇرەستى قاستەرلى پارىز ساناپ، وتانعا ادال قىزمەت ەتۋدىڭ وزىق ۇلگىسىن كورسەتتى»،– دەلىنگەن قۇتتىقتاۋ حاتتا.
ءفيلمنىڭ سيۋجەتى 2011 جىلدىڭ 12 قاراشاسىندا تاراز قالاسىندا بولعان شىنايى وقيعاعا نەگىزدەلگەن. سول كۇنى پوليتسيا كاپيتانى عازيز بايتاسوۆ ءوز ءومىرىن قيىپ، تەرروريستى توقتاتىپ، بەيبىت تۇرعىنداردىڭ ءومىرىن ساقتاپ قالعان ەدى. پوليتسەيدىڭ بۇل ەرلىگى باتىرلىقتىڭ، پاتريوتيزم مەن ادالدىقتىڭ سيمۆولىنا اينالدى.
ايدا بالاەۆا ءوز سوزىندە مۇنداي جوبالاردى قولداۋ – ۇلتتىق كينونى دامىتۋ عانا ەمەس، سونىمەن بىرگە جاس ۇرپاقتىڭ بويىنا ەرلىك، ادىلدىك، ادالدىق سياقتى قۇندىلىقتاردى دارىتۋدىڭ ماڭىزدى قۇرالى ەكەنىن اتاپ ءوتتى.
«كاپيتان بايتاسوۆتىڭ جانقيارلىق قىزمەتى – ناعىز ءپاتريوتيزمنىڭ ۇلگىسى. فيلم تەك ەرلىك تۋرالى عانا ەمەس، ار-نامىس پەن بورىش الدىنداعى ادالدىق جايىندا دا تەرەڭ ويعا جەتەلەيدى. مەملەكەتىمىزدىڭ تىنىشتىعى مەن قاۋىپسىزدىگى – ەلدەگى ءار ازاماتتىڭ ورتاق جاۋاپكەرشىلىگى.
پرەزيدەنتىمىز اتاپ وتكەن «زاڭ مەن ءتارتىپ»، «ادال ازامات» قاعيداتتارى وسى فيلمدە كورىنىس تاپقان ەرلىك پەن ەلگە ادالدىق سىندى قۇندىلىقتارمەن ۇندەسىپ جاتىر. ويتكەنى مەملەكەتتىڭ قۋاتى – زاڭ مەن تارتىپتە، ال ۇلتتىڭ بەرىكتىگى – ازاماتتارىمىزدىڭ ادالدىعى مەن جاۋاپكەرشىلىگىندە ەكەنى ءسوزسىز»، – دەدى مينيستر.
ايدا بالاەۆا سونداي-اق ءفيلمدى تۇسىرۋگە اتسالىسقان بارلىق شىعارماشىلىق ۇجىمعا العىسىن ءبىلدىردى.
كارتينانىڭ رەجيسسەرى – داۋرەن قامشىباەۆ. باستى رولدەردى بەلگىلى قازاقستاندىق اكتەرلەر – ازامات ساتىبالدى، ەركەبۇلان دايىروۆ، اسان ءماجيت، دارحان سۇلەيمەنوۆ، قوبىلاندى بولات جانە سامال ەسلياموۆا سومداعان.
«كاپيتان بايتاسوۆ» ءفيلمى 23 قازاننان باستاپ قازاقستاننىڭ بارلىق كينوتەاترلارىندا كورسەتىلەدى.
