بۇگىن، 7 قازاندا قازاقستانىڭ حالىق ءارتىسى، قىرعىزستاننىڭ ەڭبەك سىڭىرگەن ءارتىسى، قازاقستان جاستار وداعى سىيلىعىنىڭ يەگەرى دوسقان جولجاقسىنوۆ 75 جاسقا تولدى، دەپ حابارلايدى «ادىرنا» ءتىلشىسى.
ول 1951 جىلى شىعىس قازاقستان وبلىسىنىڭ كۇرشىم اۋدانىندا تۋعان. الماتى مەملەكەتتىك ونەر ينستيتۋتىن بىتىرگەن. ونەر يەسى ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ اكتەرى، 1995-2001 جىلدارى وسى تەاتردىڭ ديرەكتورى ءارى كوركەمدىك جەتەكشىسى بولعان.
اكتەر تەاتر ساحناسىندا جانە كينودا 200-دەن استام بەينەنى سومداعان. دوسقان جولجاقسىنوۆ ۇلتتىق كينو ونەرىنىڭ دامۋىنا ءوز ۇلەسىن قوسىپ، «گاۋھارتاس»، «دالاداعى قۋعىن»، «التىن كۇز»، «ومپا»، «اق بارىستىڭ ۇرپاقتارى»، «كوشپەندىلەر»، ء«بىرجان سال» جانە تاعى دا باسقا فيلمدەرگە تۇسكەن.
اكتەرلىك ونەرىمەن قاتار رەجيسسەرلىك، پروديۋسەرلىك جانە ستسەناريستىك قىزمەتتەرمەن دە اينالىسقان. سونىمەن بىرگە حالىق اندەرى مەن زاماناۋي كومپوزيتورلاردىڭ شىعارمالارىن شەبەر ورىندايتىن ءانشى رەتىندە تانىلعان.
