«ەندىگى جوق الەمنىڭ ءبىر بولىگىمىن». دەپاردە جابىرلەنۋشىلەردەن كەشىرىم سۇرادى

391
Adyrna.kz Telegram
https://www.adyrna.kz/storage/uploads/0iNaIe9oUEvVmFAzIvLta4d39i7y7uHQJGBRmkn0.jpg

فرانتسۋز اكتەرى جەرار دەپاردە 2025 جىلى سەكسۋالدىق زورلىق-زومبىلىق ءىسى بويىنشا شىعارىلعان سوت ۇكىمىنە قاتىستى اپەللياتسيالىق شاعىمىنان باس تارتتى. ول جابىرلەنۋشى ايەلدەرگە قاتىستى ارەكەتتەرىنىڭ ورىنسىز بولعانىن مويىنداپ، ولاردان كەشىرىم سۇرادى، دەپ حابارلايدى «ادىرنا» ءتىلشىسى.

بۇل – دەپاردەنىڭ ءوز مىنەز-قۇلقى ءۇشىن العاش رەت كەشىرىم سۇراۋى.

«مەنى كىنالى دەپ تانىدى. بۇل ۇكىمدى قابىلدايمىن»، – دەپ جازدى 77 جاستاعى اكتەر باسپاسوزگە ارنالعان مالىمدەمەسىندە.

دەپاردە ءوزىنىڭ ازىلدەرى مەن قيمىل-ارەكەتتەرىنىڭ كوبى ءوزى ادەيى قالاماسا دا، وزگەلەرگە ءتىل تيگىزىپ، كوڭىلىنە قاياۋ ءتۇسىرۋى مۇمكىن ەكەنىن مويىندادى. سونداي-اق ول «رەنجىتۋ نيەتىنىڭ بولعان-بولماعانى كەلتىرىلگەن زياندى ازايتپايتىنىن تۇسىنگەنىن» ايتتى. بۇعان قوسا، زاماننىڭ وزگەرگەنىن مويىنداپ، ءوزىن «ەندىگى جوق الەمنىڭ ءبىر بولىگى» دەپ اتادى.

دەپاردەگە تاعىلعان جىنىستىق سيپاتتاعى ءتيىسۋ ايىپتارى 2021 جىلى فيلم ءتۇسىرىلىمى كەزىندە بولعان وقيعالارعا بايلانىستى بولدى. جابىرلەنۋشىلەردىڭ ءبىرى – ءفيلمنىڭ قويۋشى سۋرەتشىسى اكتەردىڭ بەلىنەن، ىشىنەن جانە كەۋدەسىنەن ۇستاعانىن مالىمدەگەن. ال ەكىنشى جابىرلەنۋشى – رەجيسسەردىڭ كومەكشىسى ونىڭ كەۋدەسى مەن بوكسەسىنە رۇقساتسىز قول تيگىزگەنىنە شاعىمدانعان.

بۇل – اكتەرگە قاتىستى سوتقا دەيىن جەتكەن العاشقى ءىس. الايدا جالپى العاندا، وعان وسىنداي ارەكەتتەر جاسادى دەپ 20-عا جۋىق ايەل ايىپ تاققان.

2025 جىلى سوت دەپاردەنى كىنالى دەپ تانىپ، ونى ءبىر جارىم جىلعا شارتتى تۇردە باس بوستاندىعىنان ايىرۋ تۋرالى ۇكىم شىعاردى. سول كەزدە اكتەر ءوز كىناسىن مويىنداماعان ەدى.

پىكىرلەر