«انا ءتىلى – ءبىرتۇتاس موڭعوليا". ۇلان-باتوردا تۇڭعىش رەت ءتىل كەڭەسى ءوتىپ جاتىر

249
Adyrna.kz Telegram
https://www.adyrna.kz/storage/uploads/f91hf0lX7O4qGC82ZIuh0O6IaPh6zPTsJZCUvIzz.webp

موڭعوليا استاناسى ۇالان-باتوردا ەل پرەزيدەنتىنىڭ باستاماسىمەن «انا ءتىلى – ءبىرتۇتاس موڭعوليا» اتتى العاشقى ۇلتتىق كەڭەس ۇيىمداستىرىلدى، دەپ حابارلايدى “ادىرنا”. 

ءىس-شارا مەملەكەتتىك سارايدا ءوتىپ جاتىر.

جيىنعا ەلدىڭ تۇكپىر-تۇكپىرىنەن عالىمدار، زەرتتەۋشىلەر، ءتىل جانە ادەبيەت ماماندارى، ءبىلىم بەرۋ جۇيەسىنىڭ بارلىق دەڭگەيىندەگى پەداگوگتەر قاتىسۋدا. ولار انا ءتىلىن دامىتۋ مەن ءتىل ساياساتىنىڭ باسىم باعىتتارىن تالقىلاپ جاتىر.

كەڭەستە موڭعول ءتىلىن، ءداستۇرلى جازۋى مەن ادەبيەتىن وقىتۋ ساپاسىن ارتتىرۋ، وقۋ باعدارلامالارى مەن وقۋلىقتاردى جاڭارتۋ، ءبىلىم بەرۋ ادىستەمەلەرىن جەتىلدىرۋ ماسەلەلەرىنە باسىمدىق بەرىلدى. سونىمەن قاتار انا ءتىلى مەن ۇلتتىق مادەني مۇرانى كەلەر ۇرپاققا ساباقتاستىقپەن جەتكىزۋ جولدارى قاراستىرىلۋدا.

قازىر موڭعوليانىڭ ءبىلىم بەرۋ جۇيەسىندە التى اۋقىمدى رەفورما جۇزەگە اسىرىلىپ جاتىر. ونىڭ نەگىزگى باعىتتارىنىڭ ءبىرى – انا تىلىندە ءبىلىم بەرۋدى دامىتۋ جانە بالالاردىڭ ءماتىندى ءتۇسىنىپ وقۋ داعدىسىن قالىپتاستىرۋ.

بۇدان بولەك، SAT حالىقارالىق ەمتيحان جۇيەسىنە ۇقساس فورماتتاعى قابىلداۋ سىناعىن ازىرلەۋ جۇمىستارى جۇرگىزىلۋدە. ونى 2027 جىلدىڭ كوكتەمىندە سىناقتان وتكىزۋ جوسپارلانعان. ەمتيحان وقۋشىلاردىڭ موڭعول ءتىلى گرامماتيكاسىن مەڭگەرۋ دەڭگەيىن عانا ەمەس، انا تىلىندەگى ءبىلىمىن وزگە اكادەميالىق پاندەردى يگەرۋ بارىسىندا قولدانۋ قابىلەتىن دە باعالاۋعا باعىتتالعان.

فورۋم بارىسىندا «وقيتىن بالا – ويلى موڭعوليا» اتتى ۇلتتىق باستاما كوتەرىلدى. جوبا بالالاردىڭ وقۋ ساۋاتتىلىعىن ارتتىرىپ، كىتاپ وقۋدى تۇراقتى ادەتكە اينالدىرۋدى كوزدەيدى.

سونداي-اق موڭعول ءتىلىنىڭ تسيفرلىق رەسۋرستارىن دامىتۋ ماسەلەسى تالقىلاندى. اتاپ ايتقاندا، ءداستۇرلى جازۋمەن جازىلعان ماتىندەردى وڭدەۋ، ورفوگرافيالىق جانە ستيليستيكالىق قاتەلەردى تەكسەرۋ، كيريلل جانە ءداستۇرلى جازۋ اراسىنداعى ماتىندەردى تۇرلەندىرۋ قۇرالدارىن ازىرلەۋ جوسپارلانىپ وتىر. بۇعان قوسا، سويلەۋدى تانۋ جانە ماشينالىق اۋدارما تەحنولوگيالارىن جەتىلدىرۋ كوزدەلگەن.

بۇل باستامالار موڭعول ءتىلىنىڭ جاساندى ينتەللەكت سالاسىندا قولدانىلۋ اياسىن كەڭەيتۋگە مۇمكىندىك بەرمەك.

پىكىرلەر