110 ميلليوندىق پارانىڭ داۋى. موڭعوليا پرەزيدەنتى قىزمەتىنەن كەتپەك

653
Adyrna.kz Telegram
https://www.adyrna.kz/storage/uploads/eDeWIVwKOZZJeLFmInwDblEIQAyTTiFofVvp1woU.jpg

موڭعوليا پرەزيدەنتى ۋحنااگين حۇرەلسۇح ءوز بەدەلىن قالپىنا كەلتىرۋ ماقساتىندا پرەزيدەنتتىك وكىلەتتىگىنەن باس تارتۋعا نيەتتى ەكەنىن مالىمدەدى. بۇعان ونىڭ اتىنا تاعىلعان اۋىر قىلمىسقا قاتىستى ايىپتاۋلار سەبەپ بولعان، دەپ حابارلايدى «ادىرنا» ءتىلشىسى Montsame اگەنتتىگىنە سىلتەمە جاساپ.

مەملەكەت باسشىسىنىڭ سوزىنشە، سوڭعى ءبىر ايدا ونىڭ بەدەلىنە نۇقسان كەلتىرۋگە بىرنەشە رەت ارەكەت جاسالعان.

«موڭعوليا پرەزيدەنتىن اۋىر قىلمىستار جاسادى دەپ ايىپتاپ جاتىر. بۇل قانشالىقتى ورىندى؟ مەن ءبىراز ۋاقىت وسى جاعدايدى باقىلادىم. بۇل – ۇلكەن جاۋاپكەرشىلىكتى تالاپ ەتەتىن لاۋازىم. موڭعوليادا ەلدى جەكەلەگەن ادامدار ەمەس، زاڭ باسقارادى»، – دەدى ول.

حۇرەلسۇحتىڭ ايتۋىنشا، بۇعان دەيىن موڭعوليا دەموكراتيالىق پارتياسىنىڭ پارلامەنتتىك فراكتسياسى ونى وتستاۆكاعا كەتۋگە شاقىرىپ، ءىستىڭ اق-قاراسىن انىقتاۋدى تالاپ ەتكەن.

«مەن بۇل تالاپتى قولدايمىن. موڭعوليا پرەزيدەنتى رەتىندەگى وكىلەتتىگىمدى تاپسىرامىن. ماعان قاتىستى تەرگەۋ جۇرگىزىلىپ، ابىرويىم قالپىنا كەلتىرىلەدى»، – دەدى ول.

جەرگىلىكتى باق-تىڭ مالىمەتىنشە، پرەزيدەنتكە سىبايلاس جەمقورلىققا قاتىستى كۇدىك كەلتىرىلگەن بولۋى مۇمكىن.

Mongolia Daily باسىلىمىنىڭ جازۋىنشا، ايىپتاۋلار تاۆان-تولگوي – گاشۋنسۋحايت تەمىرجولىن سالۋعا ارنالعان قۇپيا تەندەرمەن بايلانىستى. اتالعان تەندەردىڭ جەڭىمپازى Bodi Group كومپانياسى بولعان. بولجام بويىنشا، كەيبىر ساياساتكەرلەر جالپى سوماسى 110 ميلليون دوللار بولاتىن پارا العان بولۋى مۇمكىن.

ۋحنااگين حۇرەلسۇح 2021 جىلدىڭ 25 ماۋسىمىنان بەرى موڭعوليا پرەزيدەنتى قىزمەتىن اتقارىپ كەلەدى. ول 2017–2021 جىلدارى ەل ۇكىمەتىن باسقارعان. سونداي-اق ۆيتسە-پرەمەر قىزمەتىن اتقارىپ، موڭعوليا حالىق پارتياسىنىڭ توراعاسى بولعان.

پىكىرلەر