60 ملننان استام مال باسى بار موڭعوليا بۇرىن-سوڭدى بولماعان ەت باعاسىنىڭ كۇرت وسۋىنە تاپ بولدى. News.mn اگەنتتىگىنىڭ مالىمەتىنشە، مۇنداي جوعارى كورسەتكىشتەر سوڭعى 4–5 جىلدا بايقالماعان، دەپ حابارلايدى «ادىرنا» ءتىلشىسى.
ۇلتتىق ستاتيستيكا كوميتەتى ەت جانە ەت ونىمدەرى باعاسىنىڭ وتكەن ايمەن سالىستىرعاندا ورتا ەسەپپەن 3,5%-عا ارتقانىن مالىمدەدى. بيىل ناۋرىزدا قوي ەتى 4,4%-عا قىمباتتاسا، سيىر ەتى مەن ەشكى ەتى 2,1%-عا وسكەن.
ساتۋشىلاردىڭ ايتۋىنشا، «حۋچيت شونحور» بازارىنداعى باعانىڭ قىمباتتاۋىنا وسى قىستا ۇسىنىستىڭ ازايۋى نەگىزگى سەبەپ بولعان. ەلدە مال باسى كوپ بولعانىنا قاراماستان، ەت قاراپايىم تۇرعىندار ءۇشىن بارعان سايىن قولجەتىمسىز بولىپ بارادى.
«ارتىق ايتقاندىق ەمەس، ەت باعاسى اسپانداپ كەتتى. وتكەن كۇزدە ەتتىڭ ءبىر كەلىسى 14 مىڭ تۇعرىق بولاتىن، ال قازىر مۇنداي باعانى بازاردان دا تابۋ مۇمكىن ەمەس، سودان بەرى باعا تۇراقتى تۇردە ءوسىپ كەلەدى»، — دەيدى 15 جىلدان بەرى جۇمىس ىستەپ كەلە جاتقان ساتۋشى ن. گانبااتارس
ول قوي ەتىن ساتۋدىڭ ءتيىمسىز بولۋىنا بايلانىستى سوڭعى ءۇش جىلدا ىشەك-قارىن ونىمدەرىنە كوشكەنىن جەتكىزدى.
كەيبىر ساۋدا ورتالىقتارىندا سيىر ەتىنىڭ ءبىر كەلىسى 32 000 (4300 تەڭگە شاماسىندا) تۇعرىقتان اسىپ كەتكەن. بۇل حالىقتىڭ تولەم قابىلەتىنە قاتىستى ۇلكەن سۇراق تۋعىزادى.
«حۋچيت شونحور» بازارىنداعى باعالار (ناۋرىز ايىنداعى جاعداي):
• سيىر ەتى: 27 000–27 500 تۇعرىق/كگ; 3600 - 3700 تەڭگە شاماسىندا.
• سۇيەگى بار سيىر ەتى: 26 000 تۇعرىق/كگ; 3500 تەڭگە شاماسىندا.
• جىلقى ەتى: 16 000–17 000 تۇعرىق/كگ; 2100 - 2300 تەڭگە شاماسىندا.
• قوي ەتى: 21 500 تۇعرىق/كگ; 2900 تەڭگە شاماسىندا.
• سۇيەگى بار ەشكى ەتى: 18 500 تۇعرىق/كگ. 2500 تەڭگە شاماسىندا.
ايتا كەتەيىك، موڭعولياداعى ەت باعاسىنىڭ جاعدايى بيلىك تاراپىنان شۇعىل نازار اۋدارۋدى قاجەت ەتەدى. نەگىزگى ازىق-تۇلىك ءونىمىنىڭ قىمباتتاۋى مەن حالىقتىڭ ساتىپ الۋ قابىلەتىنىڭ تومەندەۋى الەۋمەتتىك سالدارعا اكەلۋى مۇمكىن.
مالى مىڭعىرعان موڭعولياداعى حالىق سانى 3 ملن 600 ادامدى قۇرايدى.
