قازاقستان مەن موڭعوليا استانالارى اراسىندا تىكەلەي اۋە قاتىناسى اشىلدى. بۇل تۋرالى كولىك مينيسترلىگى مالىمدەدى، دەپ حابارلايدى «ادىرنا» ءتىلشىسى.
«قازاقستان رەسپۋبليكاسى كولىك مينيسترلىگى حالىقارالىق ۇشۋ گەوگرافياسىن كەڭەيتۋ جانە قولدانىستاعى باعىتتار بويىنشا رەيستەر جيىلىگىن ارتتىرۋ باعىتىندا تۇراقتى نەگىزدە جۇمىس جۇرگىزۋدە. وسىلايشا اتالعان جۇمىس شەڭبەرىندە 2026 جىلعى 2 ماۋسىمنان باستاپ SCAT اۋە كومپانياسى Boeing 737 MAX ۇلگىسىندەگى اۋە كەمەلەرىمەن اپتاسىنا 2 رەت (سەيسەنبى جانە جۇما كۇندەرى) جيىلىكپەن استانا – ۇلان-باتىر باعىتى بويىنشا جاڭا اۋە قاتىناسىن اشتى»،– دەلىنگەن حابارلامادا.
سونىمەن قاتار قازىرگى ۋاقىتتا موڭعوليانىڭ Hunnu Air اۋە كومپانياسى الماتى – ۇلان-باتىر باعىتى بويىنشا اپتاسىنا 3 رەت جيىلىكپەن تۇراقتى رەيستەردى ورىندايدى. اعىمداعى جىلدىڭ 6 ماۋسىمىنان باستاپ اتالعان باعىت بويىنشا رەيستەر سانى اپتاسىنا 4-كە دەيىن ارتادى. وسىلايشا، قازاقستان مەن موڭعوليا اراسىنداعى رەيستەردىڭ جالپى سانى 2 اۋە باعىتى بويىنشا اپتاسىنا 6-عا دەيىن ۇلعايادى.
استانا جانە ۇلان-باتىر قالالارى اراسىندا اۋە قاتىناسىنىڭ اشىلۋى ەكى ەل اراسىنداعى ساۋدا-ەكونوميكالىق، ينۆەستيتسيالىق، ىسكەرلىك جانە تۋريستىك ىنتىماقتاستىقتى ودان ءارى دامىتۋعا ىقپال ەتەتىن بولادى.
ۇلان-باتوردىڭ شىڭعىس حان اۋەجايىنا ۇشاق استانانىڭ نازارباەۆ اۋە الاڭىنان ۇشادى.
