"سايلاۋدا باسەكەلەستىك جەتىسپەدى". بۇل تۋرالى ەقىۇ دەموكراتيالىق ينستيتۋتتار جانە ادام قۇقىقتارى بيۋروسىنىڭ سايلاۋدى باقىلاۋ ميسسياسىنىڭ جەتەكشىسى ۋرسۋلا گاچەك ەقىۇ باقىلاۋشىلارى وتكىزگەن ءباسپاسوز ءماسليحاتى بارىسىندا مالىمدەدى، دەپ جازادى "ادىرنا" ۇلتتىق پورتالى baq.kz-كە سىلتەمە جاساپ.
ايتۋىنشا، ميسسيا جۇمىسىنا سايلاۋدان ءبىر اي بۇرىن كىرىسكەن.
ءبىز قازاننىڭ ورتاسىنان بەرى جۇمىس ىستەي باستادىق. سايلاۋ كۇنى 300-دەي بايقاۋشى بولدى. ولار قازاقستان رەسپۋبليكاسىنىڭ بارلىق اۋماعىندا ورنالاستى. سايلاۋ ورىندارىنىڭ اشىلۋىن باقىلادى. جالپى ايتقىم كەلەتىنى، سايلاۋ تەك قانا ءبىر كۇندىك جۇمىسپەن شەكتەلمەيدى. ياعني ءبىزدىڭ ميسسيامىزدىڭ جۇمىسى ءبىر كۇن عانا تەكسەرىپ قويۋدان تۇرمايدى. قازاقستانداعى كەزەكتەن تىس پرەزيدەنت سايلاۋىندا باسەكەلەستىك جەتىسپەدى. سايلاۋ تۋرالى نورماتيۆتىك قۇقىقتاردى حالىقارالىق ستاندارتتارعا جانە ەقىۇ مىندەتتەمەلەرىنە سايكەستىككە كەلتىرۋ قاجەت ەكەنىن كورسەتتى، -دەپ اتاپ ءوتتى باقىلاۋ ميسسياسىنىڭ جەتەكشىسى.
سونىمەن قاتار ول قازىرگى پرەزيدەنت پارلامەنتتىك پارتيالاردىڭ بىرلەسكەن كانديداتى رەتىندە سايلاۋعا تۇسكەندىگىن العا تارتتى.
قازىرگى پرەزيدەنت پارلامەنتتىك پارتيالاردىڭ بىرلەسكەن كانديداتى رەتىندە سايلاۋعا ءتۇستى جانە شىنىن ايتقاندا، ءىس جۇزىندە وعان ناۋقان كەزىندە ۇلكەن سىناق بولعان جوق. بايقاۋشىلاردىڭ ايتۋىنشا، ازاماتتاردىڭ تولىق قاتىسۋ قابىلەتى ايتارلىقتاي شەكتەۋلى بولىپ قالا بەرەدى. سونىڭ ىشىندە نەگىزگى بوستاندىقتاردىڭ شەكتەۋلەرىنە بايلانىستى سايلاۋ ورگاندارى سايلاۋشىلارعا باق ارقىلى اقپارات بەردى. الايدا بۇقارالىق اقپارات قۇرالدارىندا سايلاۋ ناۋقانىن از جاريالاۋ جانە اناليتيكالىق-تالدامالىق دەرەكتەردىڭ بولماۋى سايلاۋشىلاردىڭ سانالى تۇردە تاڭداۋ جاساۋ مۇمكىندىگىن شەكتەدى، - دەدى ۋرسۋلا گاچەك.
"ادىرنا" ۇلتتىق پورتالى
