بۇگىن قازاقستان رەسپۋبليكاسىنىڭ پرەزيدەنتتىگىنە كانديدات قاسىم-جومارت توقاەۆ اۋىلدار مەن اۋدان ورتالىقتارىندا العاشقى مەديتسينالىق-سانيتارلىق كومەك كورسەتىلەتىن 700 نىسان سالۋعا ۋادە بەردى. كانديدات بۇل تۋرالى رەسپۋبليكالىق قوعامدىق شتابتا «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» اتتى سايلاۋالدى باعدارلاماسىن جاريالاعان كەزدە اتاپ ءوتتى.
«مەملەكەتتىڭ تاعى ءبىر ماڭىزدى مىندەتى – حالىقتىڭ دەنساۋلىعىن جاقسارتۋ جانە ازاماتتاردىڭ ءومىر ءسۇرۋ ۇزاقتىعىن ارتتىرۋ. ءبىز مەديتسينا ماماندارىن دايارلاۋ ءىسىن جانە پروفيلاكتيكالىق جۇمىستى كۇشەيتەمىز. ءاربىر قالادا، اۋدان ورتالىعىندا، ءىرى اۋىلداردا ساپالى دارىگەرلىك كومەك كورسەتىلەتىن بولادى. بۇل – ادىلەتتى قازاقستاندى قۇرۋ ءۇشىن اسا ماڭىزدى باسىمدىقتىڭ ءبىرى»، – دەدى قاسىم-جومارت توقاەۆ.
كانديدات دەنساۋلىق ساقتاۋ سالاسىنا بولىنەتىن قارجى كولەمى كوبەيەتىنىن جەتكىزدى. ماسەلەن، 2027 جىلى وسى سالاداعى قارجى كولەمى جالپى ىشكى ءونىمنىڭ كەمىندە 5 پايىزىنا جەتەدى.
«دارىگەر ماماندىعىنىڭ بەدەلىن ارتتىرۋ ءۇشىن ولاردىڭ بيىك مارتەبەسى زاڭ جۇزىندە بەكىتىلەدى. مەديتسينا قىزمەتكەرلەرىنە جان-جاقتى قولداۋ كورسەتىلەدى. ءبىز حالىق دەنساۋلىعىن الدىن-الا تەكسەرۋ باعدارلاماسىنىڭ اياسىن كەڭەيتەمىز. ونىڭ ىشىندە ونكولوگيالىق جانە جۇقپالى ەمەس اۋرۋلاردى دەر كەزىندە انىقتاۋعا باسا ءمان بەرەمىز»، – دەدى كانديدات.
سونداي-اق قاسىم-جومارت توقاەۆ ونكولوگيالىق قىزمەت جاڭعىرتىلاتىنىن جانە بىرىڭعاي كونسۋلتاتيۆتىك ينسۋلت ورتالىعى ىسكە قوسىلاتىنىن ايتتى. بۇدان بولەك، ەل اۋماعىندا زاماناۋي پەريناتالدىق ورتالىقتار جەلىسىن قۇرۋ، بالالار ونكولوگياسى مەن گەماتولوگياسىنىڭ ۇلتتىق ورتالىعىن اشۋ كوزدەلىپ وتىر. اۋىلدار مەن اۋدان ورتالىقتارىندا العاشقى مەديتسينالىق-سانيتارلىق كومەك كورسەتىلەتىن 700 نىسان سالىنادى.
سونىمەن قاتار تەلەمەديتسينانى دامىتۋ ماسەلەسىنە دە بارىنشا ءمان بەرىلەدى. ال قازاقستاننىڭ فارماتسەۆتيكا نارىعىنداعى وتاندىق ءدارى-دارمەك ءوندىرىسىنىڭ ۇلەسىن 50 پايىزعا جەتكىزۋ كوزدەلىپ وتىر. سونداي-اق كانديداتتىڭ ايتۋىنشا، العا قويعان ماڭىزدى ماقساتتىڭ ءبىرى – تسيفرلىق جۇيەنى جەتىلدىرۋ ارقىلى دارىگەرلەردىڭ ەسەپ بەرۋ جۇمىستارىن ازايتۋ، ازاماتتاردىڭ ءوز دەنساۋلىعى تۋرالى اقپاراتقا تولىق قولجەتىمدىلىگىن قامتاماسىز ەتۋ.
قاسىم-جومارت توقاەۆتىڭ پىكىرىنشە، ەلىمىزدەگى بارلىق الەۋمەتتىك شىعىندار – ۇلتتىڭ الەۋەتىن دامىتۋعا سالىنعان ينۆەستيتسيا. سوندىقتان كانديداتتىڭ الەۋمەتتىك ساياساتى ادامدارعا ومىردەگى كەدەرگىلەردى جەڭۋگە كومەكتەسىپ قانا قويماي، ولاردىڭ ەڭبەك ەتۋگە جانە ءوز ءال-اۋقاتىن ارتتىرۋعا دەگەن ۇمتىلىسىن ىنتالاندىرۋعا باعىتتالىپ وتىر.
بۇل رەتتە مۇمكىندىگى شەكتەۋلى ازاماتتار، ءبىرىنشى كەزەكتە بالالار مەملەكەتتىڭ ۇلكەن قولداۋىنا يە بولادى. بارلىق نەگىزگى سالادا ينكليۋزيۆتى ورتانى قالىپتاستىرۋ جۇمىسى جەدەلدەتىلەدى. سونىمەن قاتار، ەرەكشە قاجەتتىلىگى بار ادامدارعا ارنايى جۇمىس ورىندارى اشىلادى جانە الەۋمەتتىك كاسىپكەرلىكتى دامىتۋ ءۇشىن جاعداي جاسالادى.
دايىنداعان: رەسپۋبليكالىق قوعامدىق شتاب استانا قالاسى، قوناەۆ 12/1.
تاپسىرىس بەرۋشى: م.ج. وسپانوۆ. قازاقستان رەسپۋبليكاسى پرەزيدەنتتىگىنە ۇمىتكەر ق.ك.توقاەۆتىڭ سايلاۋ قورىنان تولەندى.
”ادىرنا” ۇلتتىق پورتالى
