وزبەكستان ازاماتى ۆاديم حامراەۆ جەتىسۋ وبلىسىنىڭ پوليتسەيلەرىنىڭ ۇرىپ-سوعىپ، ونى قۇلدىققا ساتقانىن ايتىپ، پرەزيدەنت قاسىم-جومارت توقاەۆقا بەينەجازبا جولداپ، كومەك سۇرادى، دەپ حابارلايدى “ادىرنا” ۇلتتىق پورتالى.
الەۋمەتتىك جەلىلەردە شەتەلدىك ازاماتتىڭ قاراتال اۋدانىنىڭ ۋچاسكەلىك پويلتسەيلەرى ونى ۇرىپ-سوعىپ، اقشا بوپسالاپ، سودان كەيىن ونى فەرماعا قۇلدىققا التى قوي مەن 200 مىڭ تەڭگەگە ساتقانىن ايتقانى تۋرالى بەينەجازبا تارادى.
"ايەلىم مەن قايىن اتاما مەنى جەر اۋدارىپ كەتتى دەپ ايتقان، بىراق مەن فازەندادا بولدىم. كەشە قاشىپ كەتتىم. ەكى بالام بار. مەن شارشادىم، ول جەردە مەن ءبارىن ىستەيمىن، پەش جاعامىن، كوكونىس باقتارىن قازامىن. ولار مەنى كۇن سايىن قورلاپ، بوپسالايدى، ولتىرەمىن دەپ قورقىتادى. ماعان وسى قيىن جاعدايدان شىعۋعا كومەكتەسىڭىزشى. سىزدەن ءوتىنىپ سۇرايمىن، قۇرمەتتى پرەزيدەنت", – دەدى ەر ادام.
دالەل رەتىندە ول دەنەسىندەگى تىرتىقتارىن كورسەتتى. جەتىسۋ وبلىسىنىڭ پد ءباسپاسوز قىزمەتىندە بەينەجازبادا اقپاراتقا تۇسىنىكتەمە بەرىلدى.
"اتالعان فاكتى بويىنشا قر قك 362-بابىنىڭ 4-بولىمىندە "بيلىكتى نەمەسە لاۋازىمدىق وكىلەتتىكتەردى اسىرا پايدالانۋ" دەپ كوزدەلگەن قىلمىستىق ءىس قوزعالعانىن حابارلايمىز. سوتقا دەيىنگى تەرگەۋ قاۋىپسىزدىك باسقارماسىنىڭ باقىلاۋىندا. 38 جاستاعى شەتەل ازاماتى انىقتالىپ، ودان جاۋاپ الىندى. ءىس بويىنشا تەرگەۋدى وبلىستىق پوليتسيا دەپارتامەنتىنىڭ باسشىلىعى ەرەكشە باقىلاۋعا الدى", – دەلىنگەن ۆەدومستۆونىڭ حابارلاماسىندا.
