مەملەكەت باسشىسى قاسىم-جومارت توقاەۆ تاجىكستان پرەزيدەنتى ەمومالي راحموندى Qoja Ahmet Yasaui وردەنىمەن ماراپاتتادى. سالتاناتتى راسىمنەن كەيىن قازاقستان پرەزيدەنتى تاجىك ارىپتەسىن نازارباەۆ اۋەجايىندا شىعارىپ سالدى، دەپ حابارلايدى "ادىرنا".
ماراپاتتاۋ راسىمىندە پرەزيدەنت قاسىم-جومارت توقاەۆ قازاق پەن تاجىك حالىقتارىن عاسىرلاردان تامىر تارتاتىن دوستىق، رۋحاني ۇندەستىك جانە ورتاق تاريحي تاعدىر بايلانىستىراتىنىن اتاپ ءوتتى.
پرەزيدەنتتىڭ ايتۋىنشا، قوجا احمەت ءياساۋيدىڭ مۇراسى – بۇكىل وركەنيەتكە، سونىڭ ىشىندە ورتاق رۋحاني داستۇرلەرى قالىپتاسقان ورتالىق ازيا حالىقتارىنا تيەسىلى قازىنا. سونداي-اق ول ۇلى ويشىلدىڭ ءىلىمى ادامگەرشىلىك، ادىلەت، مەيىرىم جانە گۋمانيزم يدەيالارىن دارىپتەيتىنىن ايتتى.
بيىلعى مامىر ايىندا تۇركيا پرەزيدەنتى رەجەپ تايىپ ەردوعان استاناعا ساپارىندا Qoja Ahmet Yasaui وردەنىنىڭ العاشقى يەگەرى اتانعان. ىلە-شالا يۋنەسكو-نىڭ بۇرىنعى باس ديرەكتورى ودرە ازۋلەنە حانىم دا Qoja Ahmet Yasaui وردەنىمەن ماراپاتتالعان
قاسىم-جومارت توقاەۆ ەمومالي راحموننىڭ تاجىكستاننىڭ مەملەكەتتىلىگىن نىعايتۋعا، قوعامدىق كەلىسىمدى ساقتاۋعا جانە ەلدىڭ وركەندەۋىنە قوسقان ۇلەسىن اتاپ ءوتتى. سونداي-اق ونىڭ ورتالىق ازياداعى تۇراقتىلىق پەن قاۋىپسىزدىكتى نىعايتۋداعى، قازاقستان مەن تاجىكستان اراسىنداعى دوستىق جانە وداقتاستىق قاتىناستاردى دامىتۋداعى رولىنە توقتالدى.
ايتا كەتەيىك، ەمومالي راحموننىڭ قازاقستانعا رەسمي ساپارى 5–7 قاراشا ارالىعىندا ءوتتى.
مەملەكەت باسشىسى قاسىم-جومارت توقاەۆ مارتەبەلى مەيماندى بۇگىن، 7 قاراشادا استاناداعى نازارباەۆ اۋەجايىنان شىعارىپ سالدى.
بۇعان دەيىن دە مەملەكەت باسشىسى قاسىم-جومارت توقاەۆ ەلىمىزگە اقابا پروتسەسى سامميتىنە قاتىسۋ ءۇشىن جۇمىس ساپارىمەن كەلگەن وزبەكستان باسشىسى شاۆكات ميرزيوەۆتى ەلوردا اۋەجايىنان شىعارىپ سالعان ەدى.
