ازەربايجان، اقش جانە ارمەنيا «حالىقارالىق بەيبىتشىلىك پەن وركەندەۋ جولىنداعى ترامپ باعىتى» (TRIPP) جوباسىن جۇزەگە اسىرۋعا دايىندىق جۇمىستارىن باستادى، دەپ حابارلايدى "ادىرنا".
ءۇش ەل جوبانى جوسپارلاۋ بويىنشا بىرلەسكەن تەحنيكالىق جۇمىس توپتارىن قۇردى.
Report دەرەگىنشە جۇمىس توپتارىنىڭ قىزمەتىنە اقش مەملەكەتتىك حاتشىسىنىڭ ەۋروپا جانە ەۋرازيا ىستەرى جونىندەگى كومەكشىسى برەندان حانراحان، ازەربايجان سىرتقى ىستەر ءمينيسترىنىڭ ورىنباسارى ەلنۇر مامەدوۆ جانە ارمەنيا سىرتقى ىستەر ءمينيسترىنىڭ ورىنباسارى ۆاان كوستانيان قاتىستى.
مالىمدەمەدە جاڭا فورمات ءۇش ەلدىڭ مەملەكەتتىك ورگاندارى وكىلدەرى مەن تەحنيكالىق ساراپشىلارىن بىرىكتىرەتىنى ايتىلعان. نەگىزگى ماقسات – وڭىرلىك كولىك بايلانىستارىن دامىتۋ، ۇزاق مەرزىمدى تۇراقتىلىقتى نىعايتۋ جانە ەكونوميكالىق ىنتىماقتاستىقتى كەڭەيتۋ.
تاراپتار العاشقى كەزەڭدە ەكى ۇشجاقتى جۇمىس توبىن قۇرۋعا كەلىسكەن. ونىڭ ءبىرى كولىك قاتىناسى، ەكىنشىسى ەلەكتر ەنەرگياسىن جەتكىزۋ ماسەلەلەرىمەن اينالىسادى.
جۇمىس توپتارى كۇردەلى تەحنيكالىق ماسەلەلەردى پىسىقتاپ، جوبانى ىسكە اسىرۋدىڭ كەلەسى كەزەڭدەرىنە وتۋگە ىقپال ەتەدى. سونىمەن قاتار TRIPP باعىتىن وڭىردەگى وزگە ينفراقۇرىلىمدىق جەلىلەرمەن بىرىكتىرۋ ماسەلەسى قاراستىرىلادى.
ءۇش ەل وكىلدەرى جوبانىڭ بارلىق قۇرامداس بولىگىن مۇمكىندىگىنشە قىسقا مەرزىمدە ءىس جۇزىندە ىسكە قوسۋعا دايىن ەكەنىن راستادى.
