قازاقستان قىرعىزستان اۋماعىنداعى بىرقاتار نىساندار مەن جەر تەلىمدەرىن ۇزاق مەرزىمگە جالعا الادى، دەپ حابارلايدى “ادىرنا" ۇلتتىق پورتالى.
ءتيىستى كەلىسىمدەر مەن شارتتاردى سەنات دەپۋتاتتارى راتيفيكاتسيالادى.
راتيفيكاتسيالانعان قۇجاتتاردىڭ ءبىرى – قازاقستان مەن قىرعىزستان ۇكىمەتتەرى اراسىنداعى ىستىقكول وبلىسىنداعى كۋرورت-ساۋىقتىرۋ نىساندارىنا مەنشىك قۇقىعىن رەتتەۋ تۋرالى كەلىسىم. قۇجاتقا سايكەس، قازاقستان تاراپىنا تيەسىلى نىساندار (بازا وبەكتىسىنەن باسقا) 2029 جىلدىڭ سوڭىنا دەيىن جىل بويى جۇمىس ىستەيتىن 3 جانە 4 جۇلدىزدى قوناقۇي دەڭگەيىنە دەيىن جاڭعىرتىلۋى ءتيىس.
اتالعان كەلىسىمگە 2006 جىلعى 4 شىلدەدە قول قويىلعان.
سەنات دەپۋتاتى نۇريا نيازوۆانىڭ ايتۋىنشا، كەلىسىم اياسىندا قازاقستان ينۆەستورلار تارتۋعا، بەرىلگەن اۋماقتاعى ەسكى نىسانداردى بۇزۋعا قۇقىلى.
قۇجات قازاقستاننىڭ ءتورت نىسانعا مەنشىك قۇقىعىن بەكىتەدى. ولار «قازاقستان» ءساناتوريى، «سامال» دەمالىس ءۇيى، «ۋنيۆەرسيتەت» سپورت-ساۋىقتىرۋ لاگەرى جانە «وليمپ» سپورت-ساۋىقتىرۋ ورتالىقتارى بولىپ تۇر.
قازىرگى ۋاقىتتا پرەزيدەنت ءىس باسقارماسى ىستىقكول جاعالاۋىندا «قازاقستان» ءساناتوريىن سالۋ بويىنشا ينۆەستيتسيالىق جوبانى جۇزەگە اسىرىپ جاتىر.
نىساندى پايدالانۋعا بەرۋ 2026 جىلدىڭ ءتورتىنشى توقسانىنا جوسپارلانعان. جوبا اياسىندا ساناتوري اۋماعىنداعى بارلىق عيماراتتاردى بۇزۋ كوزدەلگەن. تەك دىنمۇحامەد قوناەۆتىڭ №1 ساياجايى تاريحي-مادەني مۇرا نىسانى رەتىندە ساقتالىپ، ءۇي-مۋزەيگە اينالدىرىلماق.
سونىمەن قاتار سەنات قازاقستان مەن قىرعىزستان ۇكىمەتتەرى اراسىنداعى 2009 جىلعى 1 جەلتوقسانداعى جەر تەلىمدەرىن جالعا بەرۋ تۋرالى شارتتى دا راتيفيكاتسيالادى. قۇجاتقا سايكەس، جالپى اۋماعى 58,8 گەكتار جەر تەلىمى قازاقستانعا 49 جىل مەرزىمگە ۋاقىتشا اقىلى پايدالانۋعا بەرىلەدى.
قىرعىز تاراپى جالعا بەرىلگەن نىسانداردىڭ قول سۇعىلماۋىنا كەپىلدىك بەرىپ، ولاردى مەملەكەتتىك مەنشىككە الىپ قويۋعا باعىتتالعان ارەكەتتەردەن باس تارتۋعا مىندەتتەنەدى.
