رەسەي ادىلەت مينيسترلىگى ينتەرنەت-رەسۋرس «Respublika.kz.media»-نى شەتەلدىك اگەنتتەر رەەسترىنە قوستى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
اقپارات 2026 جىلدىڭ 27 اقپانىندا تاراعان.
اتالعان جوبا — بۇرىنعى وپپوزيتسيالىق «رەسپۋبليكا» گازەتىنىڭ جۋرناليستەرى قۇرعان مەديا الاڭ. ول قازاقستان مەن ورتالىق ازيا ەلدەرىندەگى ساياسي-الەۋمەتتىك وقيعالاردى جاريالاپ كەلەدى.
ۆەدومستۆونىڭ مالىمدەۋىنشە، «Respublika.kz.media» شەتەلدىك اگەنتتەر مەن رەسەيدە «قالاۋسىز ۇيىم» دەپ تانىلعان قۇرىلىمداردىڭ ماتەريالدارىن تاراتقان.
سونىمەن قاتار، رەسەي بيلىگىنىڭ شەشىمدەرى تۋرالى «شىنايى ەمەس اقپارات» جاريالاعان. سونىمەن قاتار مينيسترلىك جوبا شەتەلدىك ۇيىمنىڭ قولداۋىمەن قۇرىلعانىن جانە ونىڭ باسشىلىعى رەسەيدەن تىس جەردە جۇزەگە اسىرىلاتىنىن العا تارتقان.
رەەستردەگى «جوبا قاتىسۋشىلارى» باعانىندا باس رەداكتور يرينا پەترۋشوۆا كورسەتىلگەن. «شەتەل اگەنتى» ءتۇرى رەتىندە «وزگە تۇلعالار بىرلەستىگى» دەپ بەلگىلەنگەن.
بۇل — رەسەيلىك بيلىك اپتا سايىن جاڭارتىپ وتىراتىن «اگەنتتەر» تىزىمىنە قازاقستاندىق بۇقارالىق اقپارات قۇرالىنىڭ العاش رەت ەنگىزىلۋى.
قازاقستاندىق باسىلىم سوڭعى جىلدارى ۋكراينادا قازا تاپقان قازاقستاندىق جۋرناليست ايدوس سادىقوۆتىڭ ولىمىنە قاتىستى جانە نۇرسۇلتان نازارباەۆتىڭ وتباسىنىڭ شەتەلدەگى اكتيۆتەرى جونىندەگى زەرتتەۋ ماتەريالدارىن جاريالاعان. وتكەن كۇزدەن بەرى «رەسپۋبليكا» سايتى قازاقستان اۋماعىندا اشىلمايدى.
