ءال-فارابي اتىنداعى قازاق ۇلتتىق ۋنيۆەرسيتەتىندە ءبىرىنشى كۋرس ستۋدەنتىنىڭ قازاسىنان كەيىن ەكى باسشى قىزمەتىنەن بوساتىلدى. بۇل تۋرالى بۇگىن، 17 قاراشادا وقۋ ورنىنىڭ ءباسپاسوز قىزمەتى مالىمدەدى، دەپ حابارلايدى «ادىرنا».
ۋنيۆەرسيتەت اكىمشىلىگىنىڭ مالىمەتىنشە، قايعىلى وقيعادان كەيىن شۇعىل شارالار قابىلدانعان.
«تاربيە جۇمىسىن اقساتقانى، جاتاقحاناداعى قاۋىپسىزدىك پەن ءتارتىپتى ءتيىستى دەڭگەيدە قامتاماسىز ەتە الماعانى ءۇشىن باسقارما مۇشەسى – الەۋمەتتىك تۇراقتى دامۋ جونىندەگى پرورەكتور، گەوگرافيا جانە تابيعاتتى پايدالانۋ فاكۋلتەتىنىڭ دەكانى لاۋازىمدارىنان بوساتىلدى»، – دەلىنگەن ۋنيۆەرسيتەتتىڭ رەسمي حابارلاماسىندا.
سونىمەن قاتار قايعىلى وقيعا بولعان كۇنى جاتاقحانادا كەزەكشىلىكتە بولعان جاۋاپتى قىزمەتكەرلەر جۇمىستان شەتتەتىلىپ، ولاردىڭ ارەكەتتەرىنە قۇقىقتىق باعا بەرىلىپ جاتىر.
ۋنيۆەرسيتەت باسشىلىعى ستۋدەنتتىڭ قازاسىنا بايلانىستى مارقۇمنىڭ وتباسىنا كوڭىل ايتىپ، قايعىسىنا ورتاق ەكەنىن جەتكىزدى.
«بولعان وقيعا – ۋنيۆەرسيتەت قاۋىمى ءۇشىن ورنى تولماس اۋىر قايعى. ستۋدەنتىمىزدىڭ قازاسى قابىرعامىزدى قايىستىردى»، – دەلىنگەن حابارلامادا.
سونداي-اق وقۋ ورنى مارقۇمنىڭ وتباسىمەن بايلانىستا ەكەنىن جانە قاجەتتى قولداۋ كورسەتۋگە دايىن ەكەنىن مالىمدەدى.
قازىرگى ۋاقىتتا بارلىق جاتاقحانادا كەشكى باقىلاۋ كۇشەيتىلىپ، ستۋدەنتتەردىڭ قاۋىپسىزدىگىن قامتاماسىز ەتۋ جانە كاسىبي پسيحولوگيالىق كومەك كورسەتۋ بويىنشا قوسىمشا شارالار ەنگىزىلگەن.
ۋنيۆەرسيتەت وكىلدەرى تەرگەۋ جۇمىستارىنا تولىقتاي كومەكتەسىپ جاتقانىن اتاپ ءوتتى.
«ۋنيۆەرسيتەت بۇل وقيعاعا قاتىستى ەشقانداي دەرەكتى جاسىرمايدى، قۇقىق قورعاۋ ورگاندارى جۇرگىزىپ جاتقان تەرگەۋگە تولىق كومەك كورسەتۋدە جانە ءىستىڭ ءادىل، اشىق وتۋىنە تىكەلەي مۇددەلى»، – دەلىنگەن ءباسپاسوز قىزمەتىنىڭ مالىمدەمەسىندە.
قر قىلمىستىق-پروتسەستىك كودەكسىنىڭ 201-بابىنا سايكەس، تەرگەۋ قۇپياسىنا بايلانىستى وقيعاعا قاتىستى وزگە اقپارات ازىرگە جاريالانبايدى.
ەسكە سالايىق، بۇعان دەيىن ءال-فارابي اتىنداعى قازۇۋ-دىڭ 1 كۋرس ستۋدەنتىنىڭ كىسى قولىنان قازا تاپقانى، ودان بۇرىن 6 قاراشادا تاعى 1 كۋرس ستۋدەنتى ءولىمى حابارلانعان ەدى. اتالعان وقيعالارعا بايلانىستى پوليتسيا قىلمىستىق ءىس قوزعاعان.
قازۇۋ باسشىلىعىنىڭ جەر ۋچاسكەلەرىن بەرۋگە قاتىسى بار دەگەن جاريالانىمدار شىندىققا سايكەس كەلمەيدى - قازۇۋ
