بۇگىن قر عىلىم جانە جوعارى ءبىلىم ءمينيسترى ساياسات نۇربەك QS Quacquarelli Symonds پرەزيدەنتى نۋنتسيو كۆاكۆارەلليمەن كەزدەستى. جيىنعا جوعارى وقۋ ورىندارىنىڭ رەكتورلارى دا قاتىستى. ولار قازاقستاندىق ۋنيۆەرسيتەتتەردىڭ جاھاندىق باسەكەگە قابىلەتتىلىگىن ارتتىرۋ ماسەلەلەرىن تالقىلادى.
ل. ن.گۋميلەۆ اتىنداعى ەۇۋ-دا وتكەن كەزدەسۋدە QS Quacquarelli Symonds نەگىزىن قالاۋشى نۋنتسيو كۆاكۆارەللي تۇساۋكەسەر وتكىزدى. ونىڭ ايتۋىنشا، قازاقستان ازيا ۋنيۆەرسيتەتتەرى رەيتينگىنىڭ جاڭا شىعارىلىمىندا ۇزدىك ناتيجەلەر كورسەتتى.
ەكى قازاقستاندىق جوعارى وقۋ ورنى ازياداعى ۇزدىك 100 ۋنيۆەرسيتەتتىڭ قاتارىنا كىردى. ءال-فارابي اتىنداعى قازاق ۇلتتىق ۋنيۆەرسيتەتى 44-ورىندى يەلەنىپ، ۇزدىك ازيالىق جوعارى وقۋ ورىندارىنىڭ توپ-50 تىزىمىنە ەندى. ال، ل. ن. گۋميلەۆ اتىنداعى ەۇۋ 96-ورىنعا ورنالاستى. قازاقستان ورتالىق ازيانىڭ باسقا ەلدەرىنە قاراعاندا رەيتينگتە كوش ىلگەرى. ۇزدىك ازيالىق جوعارى وقۋ ورىندارىنىڭ تىزبەسىندە ەلىمىزدىڭ 32 ۋنيۆەرسيتەتى بار.
ورتالىق ازيانىڭ ۇزدىك ۇشتىگىنە دە قازاقستاندىق جوعارى وقۋ ورىندارى ەنگەن. ولار حالىقارالىق ينديكاتورلار بويىنشا ەڭ جوعارى ورىنداردا تۇر. ءال-فارابي اتىنداعى قازۇۋ ورتالىق ازيا وڭىرىندەگى جۇمىس بەرۋشىلەر اراسىندا اكادەميالىق بەدەلدىڭ ەڭ جوعارى كورسەتكىشتەرىنە يە. ۇزدىك ۇشتىككە ل. ن.گۋميلەۆ اتىنداعى ەۇۋ جانە Satbayev University كىردى.
«ەلىمىزدەگى جوعارى ءبىلىم سالاسى حالىقارالىق دەڭگەيدە تانىلىپ كەلە جاتقانىن كورىپ وتىرمىز. الەمدىك رەيتينگتەردە العا جىلجۋ – قازاقستاندىق ءبىلىم بەرۋ ساپاسى مەن ۋنيۆەرسيتەتتەردىڭ مارتەبەسىن جاقسارتۋدىڭ كورنەكى دالەلى. بۇل ءبىزدىڭ جوعارى وقۋ ورىندارىنىڭ حالىقارالىق ارەناداعى باسەكەگە قابىلەتتىلىگىن كورسەتەدى»، – دەدى مينيستر.
مينيستر ساياسات نۇربەك شەتەلدىك مەيمانعا ەلىمىزگە ساپارى ءۇشىن العىسىن ءبىلدىرىپ، قازاقستاندىق جوعارى وقۋ ورىندارى QS رەيتينگىندە جاڭا شىڭدارعا جەتۋ ءۇشىن جۇمىستى جالعاستىراتىنىن اتاپ ءوتتى.
