قازاقستاندا الەۋمەتتىك، كولىك جانە ينجەنەرلىك ينفراقۇرىلىمدى جاڭعىرتۋ ءۇشىن 2029 جىلدىڭ سوڭىنا دەيىن ۇلتتىق قوردان شامامەن 6,5 تريلليون تەڭگە بولىنەدى. بۇل تۋرالى مەملەكەت باسشىسى قاسىم-جومارت توقاەۆ ءوز جولداۋىندا ايتتى، دەپ حابارلايدى «ادىرنا» ءتىلشىسى.
پرەزيدەنتتىڭ سوزىنشە، ەل بويىنشا اسا قاجەتتى ينفراقۇرىلىم نىساندارىن سالۋ جانە جاڭعىرتۋ جۇمىستارى قولعا الىنادى. وسى ماقساتتا ۇكىمەت بۇرىن-سوڭدى بولماعان ينفراقۇرىلىمدىق جاڭعىرۋ جوسپارىن ازىرلەيدى.
«بۇل اۋقىمدى جۇمىستى ىسكە اسىرۋ ءۇشىن 2029 جىلدىڭ سوڭىنا دەيىن ۇلتتىق قوردان شامامەن 6,5 تريلليون تەڭگە بولىنەدى. بيىل جانە 2027 جىلدىڭ العاشقى ەكى ايى ىشىندە الەۋمەتتىك جوبالاردى ىسكە قوسۋ ءۇشىن 1,5 تريلليون تەڭگە كولەمىندە قاراجات قاراستىرۋ قاجەت»، – دەدى قاسىم-جومارت توقاەۆ.
پرەزيدەنت ەل ەكونوميكاسىنىڭ الەۋەتىنە دە توقتالدى. ونىڭ سوزىنشە، حالىقارالىق ۆاليۋتا قورىنىڭ بولجامىنا سايكەس، بيىل قازاقستاننىڭ جالپى ىشكى ءونىمى 400 ميلليارد دوللارعا جۋىقتايدى. جان باسىنا شاققانداعى كورسەتكىش 19 مىڭ دوللاردان اسادى دەپ كۇتىلۋدە.
سونىمەن قاتار مەملەكەت باسشىسى وڭدەۋ ونەركاسىبىنىڭ جالپى ىشكى ونىمدەگى ۇلەسى 14 پايىزدان اسقانىن، ال التىن-ۆاليۋتا رەزەرۆى مەن ۇلتتىق قور اكتيۆتەرىنىڭ جالپى كولەمى 130 ميلليارد دوللاردان جوعارى ەكەنىن اتاپ ءوتتى.
توقاەۆ بۇل الەۋەتتى ينفراقۇرىلىمدى جاڭعىرتۋعا جانە وڭىرلەردى دامىتۋعا باعىتتاۋ قاجەتتىگىن ايتتى.
بۇدان بولەك، پرەزيدەنت قالالاردى دامىتۋ ماسەلەسىنە دە نازار اۋداردى. ونىڭ پىكىرىنشە، ءاربىر ءىرى قالانىڭ ۇكىمەت بەكىتكەن ورتا جانە ۇزاق مەرزىمدى دامۋ جوسپارى بولۋى كەرەك. سونداي-اق قالا ينفراقۇرىلىمىن ءتيىمدى باسقارۋ ءۇشىن ونىڭ تسيفرلىق سىڭارىن ازىرلەۋ تاپسىرىلدى.
مەملەكەت باسشىسى قالالاردىڭ قاۋىپسىز، جايلى ءارى كورىكتى بولۋىن ماڭىزدى مەملەكەتتىك مىندەت رەتىندە قاراستىرۋ قاجەتتىگىن جەتكىزدى. ونىڭ ايتۋىنشا، قالالاردىڭ قارقىندى دامۋى ءوڭىر ەكونوميكاسىنىڭ وركەندەۋىنە جانە ادامي الەۋەتتىڭ ارتۋىنا ىقپال ەتەدى.
