ازەربايجان ءوز اۋماعىندا قازاقستان مەن رەسەيدەن تاراۋى مۇمكىن شەگىرتكەنىڭ جەكەلەگەن تۇرلەرى تىركەلگەنىن جاريالادى، دەپ حابارلايدى "ادىرنا" ۇلتتىق پورتالى.
بۇل تۋرالى ازەربايجاننىڭ ازىق-تۇلىك قاۋىپسىزدىگى اگەنتتىگى مالىمدەدى. ۆەدومستۆونىڭ مالىمەتىنشە، ماماندار ەلدىڭ ءتۇرلى ايماقتارىنداعى 95 باقىلاۋ نۇكتەسىندە مونيتورينگ جۇرگىزگەن. زەرتحانالىق زەرتتەۋلەر ناتيجەسىندە كارانتيندىك ساناتقا جاتپايتىن ينۆازيالىق شەگىرتكە تۇرلەرىنىڭ، اتاپ ايتقاندا، كىشى كرەست ءتارىزدى شەگىرتكە، بەربەر شەگىرتكەسى جانە باسقا دا تۇرلەردىڭ قونىس اۋدارعانى انىقتالعان.
زەرتتەۋ قورىتىندىسى بۇل جاندىكتەردىڭ ازەربايجان فاۋناسىنا ءتان ەمەس ەكەنىن كورسەتتى دەلىنەدى. ماماندار ولاردىڭ قازاقستان مەن رەسەي اۋماعىنان كوشىپ كەلگەن بولۋى مۇمكىن ەكەنىن بولجاۋدا.
قازىر فيتوسانيتاريالىق قاۋىپسىزدىكتى قامتاماسىز ەتۋ ماقساتىندا ازەربايجاننىڭ ازىق-تۇلىك قاۋىپسىزدىگى اگەنتتىگى، اۋىل شارۋاشىلىعى مينيسترلىگى جانە ەكولوگيا جانە تابيعي رەسۋرستار مينيسترلىگى بىرلەسىپ مونيتورينگ پەن زيانكەستەرگە قارسى كۇرەس جۇمىستارىن جالعاستىرىپ جاتىر.
قابىلدانىپ جاتقان شارالار شەگىرتكەنىڭ سانىن باقىلاۋعا، اۋىل شارۋاشىلىعى القاپتارىنا كەلەتىن زياندى ازايتۋعا جانە ولاردىڭ باسقا اۋماقتارعا تارالۋىنىڭ الدىن الۋعا باعىتتالعان.
ايتا كەتەيىك، سوڭعى كۇندەرى ازەربايجاننىڭ بىرنەشە وڭىرىندە شەگىرتكەنىڭ شامادان تىس كوبەيۋى بايقالعان.
