رەسەيگە ۋكراينا ۇسىنعان كەلىسسوزدەر باستاماسىنا جاۋاپ بەرەتىن ۋاقىت كەلدى. بۇل تۋرالى ۋكراينانىڭ سىرتقى ىستەر ءمينيسترى اندرەي سيبيگا ح الەۋمەتتىك جەلىسىندەگى پاراقشاسىندا جازدى، دەپ حابارلايدى «ادىرنا» ءتىلشىسى.
«رەسەيلىكتەر «انكوريدج رۋحى» تۋرالى ايتقاندى جاقسى كورەدى. ال ونىڭ ناقتى نە ەكەنىن ەشكىم بىلمەيدى. دەسە دە، رەسەيلىكتەر وعان سەنەدى جانە وزگەلەر دە سەنۋى ءتيىس دەپ ەسەپتەيدى. شىندىق ءبىر نارسەنى انىق كورسەتىپ وتىر: ەگەر «انكوريدج رۋحى» ءبىر كەزدەرى بولعان بولسا، قازىر ول مۇلدە جوق»، – دەدى ۋكراينا ءسىم باسشىسى.
سيبيگانىڭ ايتۋىنشا، ماسكەۋ ەلەستەرگە سەنۋدى دوعارىپ، ونىڭ ورنىنا ۋكراينانىڭ كەلىسسوز ۇستەلىنە وتىرىپ، سوعىستى توقتاتۋ جونىندەگى ناقتى ۇسىنىستارىنا جاۋاپ بەرۋى كەرەك.
«ۆلاديمير پۋتين شىندىقتى مويىنداۋدان قانشالىقتى ۇزاق باس تارتسا، ياعني ۇرىس الاڭىندا ءوز ماقساتتارىنا ەشقاشان جەتە المايتىنىن تۇسىنگىسى كەلمەسە، رەسەي ءۇشىن جاعداي سونشالىقتى قيىنداي بەرەدى»، – دەدى ول.
ەسكە سالايىق، بۇعان دەيىن ماسكەۋ ۆاشينگتوندى رەسەي مەن ۋكراينا اراسىنداعى سوعىس بويىنشا كەلىسسوزدەردە «بەيتاراپ دەلدال بولۋدان قالدى» دەپ سىناپ، انكوريدجدەگى ۋاعدالاستىقتاردى ەسكە سالعان بولاتىن. كەيىن اقش مەملەكەتتىك حاتشىسى ماركو رۋبيو بىلتىر وتكەن دونالد ترامپ پەن ۆلاديمير پۋتين اراسىنداعى سامميتتە ۋكرايناعا قاتىستى ەشقانداي كەلىسىم جاسالماعانىن مالىمدەدى.
باق مالىمەتىنشە، وتكەن اپتادا وتكەن G7 سامميتىندە ترامپ «انكوريدج تۇسىنىگىنەن» باس تارتۋى مۇمكىن ەكەنىن اڭعارتقان. سونداي-اق اقش پرەزيدەنتى ۋكراينا باسشىسى سوعىستى جۇرگىزۋدە «جامان ناتيجە كورسەتىپ وتىرعان جوق» دەگەن پىكىر بىلدىرگەن. ساراپشىلار مۇنى ونىڭ ەكىنشى پرەزيدەنتتىك مەرزىمىندەگى ريتوريكاسىنىڭ ەلەۋلى وزگەرىسى رەتىندە باعالاپ وتىر.
