مەحيكودا ديماش قۇدايبەرگەننىڭ شىعارماشىلىعىنا ارنالعان فوتوكورمە اشىلدى

298
Adyrna.kz Telegram
https://www.adyrna.kz/storage/uploads/ZEkKElthCdHggNpY0xhiCSXbSsBKADQkkz7TiBh6.webp

فوتو: dimashnews.com

مەكسيكانىڭ استاناسى مەحيكودا الەمگە ايگىلى ءانشى ديماش قۇدايبەرگەننىڭ شىعارماشىلىق جولى مەن ونەردەگى جەتىستىكتەرىنە ارنالعان فوتوكورمە ۇيىمداستىرىلدى. بۇل تۋرالى dimashnews باسىلىمى جازدى، دەپ حابارلايدى "ادىرنا".

«ۇلى قازاق دالاسىنان مەكسيكانىڭ جۇرەگىنە دەيىن» دەپ اتالاتىن ەكسپوزيتسيا ارقىلى مەكسيكالىق كورەرمەندەر قازاقستاندىق ونەر يەسىنىڭ شىعارماشىلىعىمەن جانە قازاق مادەنيەتىمەن جاقىنىراق تانىسا الادى.

كورمەنىڭ سالتاناتتى اشىلۋى 19 قاراشادا تاريحي Casa de Carranza مۋزەيىندە ءوتتى. ءىس-شارا ديماش قۇدايبەرگەننىڭ مەحيكوداعى DIMENSIONS الەمدىك تۋرى اياسىندا جوسپارلانعان ەكى كونتسەرتىنىڭ العاشقى كۇنىمەن تۇسپا-تۇس كەلدى. ەكسپوزيتسيانى ءانشىنىڭ مەكسيكالىق جانكۇيەرلەرى مۋزەي اكىمشىلىگىنىڭ قولداۋىمەن ۇيىمداستىرعان.

كورمەگە ديماشتىڭ شىعارماشىلىق جولىنداعى ماڭىزدى كەزەڭدەردى، ساحناداعى ونەرىن جانە حالىقارالىق جەتىستىكتەرىن بەينەلەيتىن فوتوسۋرەتتەر قويىلعان. اشىلۋ راسىمىنە ءانشىنىڭ اناسى، قازاقستاننىڭ ەڭبەك سىڭىرگەن قايراتكەرى سۆەتلانا ايتباەۆا مەن قازاقستاننىڭ مەكسيكاداعى كونسۋلى دانيار قاراتاەۆ قاتىستى.

سۆەتلانا ايتباەۆا كورمەنى ۇيىمداستىرۋعا ۇلەس قوسقان مەكسيكالىق جانكۇيەرلەرگە ريزاشىلىعىن ءبىلدىردى. ول جەرگىلىكتى كورەرمەندەردىڭ ديماش شىعارماشىلىعىنا دەگەن قىزىعۋشىلىعى مەن ىقىلاسىن ەرەكشە اتاپ ءوتتى. سونداي-اق ەكى ەل حالقىن جاقىنداستىراتىن بەيبىتشىلىك، بىرلىك، وتباسى قۇندىلىقتارى مەن ۇلتتىق داستۇرگە قۇرمەت سەكىلدى ورتاق ۇستانىمدارعا توقتالدى.

ەكسپوزيتسيانىڭ تاريحي Casa de Carranza مۋزەيىندە ءوتۋى دە سيمۆولدىق مانگە يە. 1908 جىلى سالىنعان عيماراتتا 1919–1920 جىلدارى مەكسيكا پرەزيدەنتى ۆەنۋستيانو كاررانسا تۇرعان. بۇگىندە مۋزەي قورىندا ونىڭ ءومىرى مەن قىزمەتىنە، سونداي-اق حح عاسىردىڭ باسىنداعى مەكسيكا تاريحىنا قاتىستى تاريحي قۇجاتتار، فوتوسۋرەتتەر جانە جەكە زاتتار ساقتالعان.

سونىمەن قاتار كورمە باعدارلاماسى اياسىندا ديماش قۇدايبەرگەننىڭ شىعارماشىلىعىنا ارنالعان دەرەكتى فيلم كورسەتىلدى. بۇل باستاماعا مەكسيكا پارلامەنتىندەگى «مەكسيكا – قازاقستان» دوستىق توبىنىڭ ءتورايىمى، فەدەرالدىق دەپۋتات ماريبەل مارتينەس رۋيس قولداۋ بىلدىرگەن.

وسىلايشا، مەحيكوداعى فوتوكورمە قازاقستاندىق ونەرپازدىڭ حالىقارالىق دەڭگەيدەگى تانىمالدىعىن تانىتىپ قانا قويماي، قازاقستان مەن مەكسيكا اراسىنداعى مادەني بايلانىستى نىعايتۋعا باعىتتالعان ماڭىزدى شارالاردىڭ بىرىنە اينالدى.

پىكىرلەر