قازۇۋ رەكتورى پرەزيدەنتتەن ماقتاۋ ەستىدى

141
Adyrna.kz Telegram
https://www.adyrna.kz/storage/uploads/779GDSoiTIrKCvtdvD9W39qm2xwYFtFgm9YiFuDu.webp

قازاقستاندا 11 مەملەكەتتىڭ جەتەكشى جوعارى وقۋ ورىندارى ءوز فيليالدارىن اشقان. قازىر بۇل ءبىلىم بەرۋ ۇيىمدارىندا 12 مىڭنان استام ستۋدەنت ءبىلىم الىپ، 1,5 مىڭعا جۋىق وقىتۋشى جۇمىس ىستەيدى، دەپ حابارلايدى "ادىرنا" ءتىلشىسى.

ولاردىڭ 600-دەن استامى – شەتەلدىك پروفەسسورلار.

بۇل تۋرالى مەملەكەت باسشىسى قاسىم-جومارت توقاەۆ ايتتى. پرەزيدەنتتىڭ ايتۋىنشا، ەلىمىزدە جوعارى ءبىلىم بەرۋ سالاسىنداعى حالىقارالىق ستراتەگيالىق سەرىكتەستىك اياسىندا 40 كەلىسىم جۇزەگە اسىرىلىپ جاتىر.

سونىمەن قاتار مەملەكەت باسشىسى قازاقستاننىڭ ليسسابون جانە توكيو كونۆەنتسيالارىنا قوسىلعانىن اتاپ ءوتتى. بۇل حالىقارالىق قۇجاتتار قازاقستاندىق جوعارى وقۋ ورىندارىنىڭ ديپلومدارىن شەتەلدە تانۋعا مۇمكىندىك بەرەدى.

«قازاقستان وسى ايماقتا العاشقىلاردىڭ ءبىرى بولىپ ەۋروپاداعى ليسسابون جانە ازيا-تىنىق مۇحيتى ايماعىنداعى توكيو كونۆەنتسيالارىنا قوسىلدى. بۇل – قازىرگى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى، بۇرىنعى ءبىلىم جانە عىلىم ءمينيسترى، ەلشى جانسەيىت تۇيمەباەۆتىڭ ەڭبەگى. سونىڭ ناتيجەسىندە ەندى قازاقستان ۋنيۆەرسيتەتتەرىنىڭ ديپلومدارى باتىس جانە شىعىس ەلدەرىندە مويىندالاتىن بولدى»، – دەدى پرەزيدەنت قاسىم-جومارت توقاەۆ.

ايتا كەتەيىك، سوڭعى ۋاقىتتا ءال-فارابي اتىنداعى قازاق ۇلتتىق ۋنيۆەرسيتەتىندە بولعان قايعىلى وقيعالار قوعام نازارىن اۋداردى. ون كۇن ىشىندە ۋنيۆەرسيتەتتىڭ ەكى ءبىرىنشى كۋرس ستۋدەنتى كوز جۇمعان. وسى جاعدايلارعا بايلانىستى عىلىم جانە جوعارى ءبىلىم مينيسترلىگى وقۋ ورنىندا تەكسەرۋ جۇرگىزەتىنىن مالىمدەگەن. ال ۋنيۆەرسيتەت رەكتورى تاراپىنان ازىرگە رەسمي تۇسىنىكتەمە بەرىلگەن جوق.

پىكىرلەر