اباي وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسى مەن اباي اتىنداعى وبلىستىق امبەباپ كىتاپحاناسىنىڭ ۇيىمداستىرۋىمەن كىتاپحانا شاڭىراعىندا قازاقستاننىڭ حالىق جازۋشىسى قابدەش ءجۇمادىلوۆتىڭ 90 جىلدىعىنا ارنالعان «تاعدىرى ۇلتپەن ۇندەسكەن دارابوز جازۋشى» اتتى ەسكە الۋ كەشى ءوتتى.
شاراعا جازۋشىنىڭ ۇلدارى — ارمان، دارمەن، داۋلەت، جانىبەك پەن تۇڭعىش نەمەرەسى ەراسىل ءجۇمادىل جانە زيالى قاۋىم وكىلدەرى، قالامگەرلەر، عالىمدار، قوعام قايراتكەرلەرى مەن ستۋدەنت جاستار قاتىستى.
كەش بارىسىندا قوناقتار قالامگەر شىعارماشىلىعىنان سىر شەرتەتىن قۇندى ەڭبەكتەر مەن سيرەك باسىلىمدار، ارحيۆتىك ماتەريالدار نەگىزىندە جاساقتالعان «قارا ءسوزدىڭ دارابوزى» اتتى كىتاپ كورمەسىمەن تانىستى. كورمەدە جازۋشى مۇراسىنا قاتىستى تىڭ دەرەكتەر مەن ادەبيەت الەمىندەگى ورنى كەڭىنەن تانىستىرىلدى.
سونىمەن قاتار، «اتامۇرا» كورپوراتسياسىنىڭ دەمەۋشىلىگىمەن جارىق كورگەن «تاعدىر» كىتابىنىڭ جاڭا باسىلىمى كوپشىلىك نازارىنا ۇسىنىلىپ، ونىڭ سالتاناتتى تۇساۋكەسەرى ءوتتى. تۇساۋكەسەر ءراسىمىن كورنەكتى عالىم، قازاقستاننىڭ ەڭبەك سىڭىرگەن قايراتكەرى، فيلولوگيا عىلىمدارىنىڭ دوكتورى، پروفەسسور تۇرسىن جۇرتباي، تۇركى دۇنيەسى جازۋشىلار وداعىنىڭ توراعاسى، اقىن ۇلىقبەك ەسداۋلەت، اقىن، اكادەميك، پروفەسسور ۇلىقپان سىدىقوۆ جانە قالامگەردىڭ ۇلى ارمان قابدەشۇلى جاسادى.
جيىندا «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد، ارمان قابدەشۇلى، ۇلىقپان سىدىقوۆ جانە وزگە دە زيالى قاۋىم وكىلدەرى ءسوز سويلەپ، قابدەش ءجۇمادىلوۆتىڭ قازاق ادەبيەتىندەگى ورنى، ۇلتتىق رۋحانياتقا قوسقان ولشەۋسىز ۇلەسى تۋرالى تاعىلىمدى ويلارىمەن ءبولىستى.
«تاعدىر» رومانىنىڭ جاڭا باسىلىمىنا اق جول تىلەنىپ، بۇل ەڭبەك رۋحانياتقا قوسىلعان ماڭىزدى قۇندىلىق رەتىندە جوعارى باعالاندى.
كەش بارىسىندا قابدەش جۇمادىلوۆپەن بىرگە ۇلى كوشتىڭ تاعدىرىن بولىسكەن زامانداسى، زەينەتكەر، ەتنوگراف-تاريحشى، قازاقستان حالىق اعارتۋ ءىسىنىڭ ۇزدىگى مۇحامەتقازى مۇحاماديۇلى جانە بىرقاتار تاريحشى-عالىمدار مەن ادەبيەتتانۋشىلار جازۋشى شىعارماشىلىعى تۋرالى عىلىمي پىكىرلەرىن ورتاعا سالدى.
ساعىنىش پەن تاعزىم توعىسقان، رۋحقا قۇرمەت كورسەتىلگەن بۇل قاسيەتتى ءسات — ۇلتتىق قۇندىلىقتاردى ۇلىقتاۋدىڭ، تاريحي جادى مەن رۋحاني ساباقتاستىققا دەگەن تەرەڭ قۇرمەتتىڭ ايقىن كورىنىسى بولدى.
ريما جۇندىباەۆا،
اباي اتىنداعى وبلىستىق امبەباپ كىتاپحاناسىنىڭ
دامىتۋ ءبولىمىنىڭ باسشىسى
