مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ۆيتسە-پرەزيدەنت ەرلان قارين حالىقارالىق كينوجوبانىڭ ءتۇسىرىلىم توبى مۇشەلەرىمەن كەزدەستى. كەزدەسۋگە الەمگە ايگىلى رەجيسسەر ءارى كينواكتەر دجەكي چان، سونداي-اق شەتەلدىك جانە قازاقستاندىق پروديۋسەرلەر ەسموند رەن، رۇستەم وماروۆ، يگور تساي جانە ورىنباسار قۇدايبەرگەنوۆ قاتىستى. بۇل تۋرالى 6 قازاندا اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەزدەسۋ بارىسىندا كينەماتوگرافيا سالاسىنداعى حالىقارالىق ىنتىماقتاستىقتى دامىتۋ ماسەلەلەرى، سونداي-اق بىرلەسكەن كينوجوبالاردى ودان ءارى جۇزەگە اسىرۋ مۇمكىندىكتەرى تالقىلانعان.
ەرلان قارين پرەزيدەنت قاسىم-جومارت توقاەۆتىڭ كرەاتيۆتى يندۋستريانى دامىتۋعا جانە ازاماتتاردىڭ شىعارماشىلىق الەۋەتىن پاش ەتۋ ءۇشىن جاعداي جاساۋعا ەرەكشە كوڭىل ءبولىپ وتىرعانىن اتاپ وتكەن.
ۆيتسە-پرەزيدەنت ءىرى حالىقارالىق كينوجوبالاردىڭ قازاقستاندا ءتۇسىرىلۋى وتاندىق كينويندۋستريانىڭ دامۋىنا، جەرگىلىكتى مامانداردىڭ كاسىبي مۇمكىندىكتەرىن شىڭداۋعا جانە حالىقارالىق كينووندىرىس ءۇشىن ەلىمىزدى الەۋەتتى الاڭ رەتىندە تانىتۋعا ىقپال ەتەتىنىن جەتكىزگەن.
كەزدەسۋدە كينو سالاسىنداعى جاڭا تەحنولوگيالاردى دامىتۋ باعىتىنا دا ەرەكشە نازار اۋدارىلعان. ەرلان قارين مەملەكەت باسشىسىنىڭ شەشىمىمەن جاريالانعان بيىلعى تسيفرلاندىرۋ جانە جاساندى ينتەللەكت جىلىندا ەلوردادا Astana AI Film Festival وتكەنىن ايتتى. وعان الەمنىڭ 125 ەلىنەن 8 مىڭ ءوتىنىم كەلىپ تۇسكەن. قاتىسۋشىلاردىڭ اۋقىمى مەن گەوگرافياسى جاعىنان بۇل فەستيۆال ءاى-كينوعا ارنالعان الەمدەگى ەڭ ءىرى ءىس-شارا رەتىندە تانىلعان.
كەزدەسۋ سوڭىندا ەرلان قارين دجەكي چانعا قازاقستانعا دەگەن ايرىقشا ىقىلاسى ءۇشىن العىس ايتىپ، جوباعا قاتىسۋشىلاردىڭ الداعى شىعارماشىلىق جۇمىسىنا تابىس تىلەدى.
