رەسەيدىڭ تۇتىنۋشىلاردىڭ قۇقىقتارىن قورعاۋ جانە ادام ءال-اۋقاتىن باقىلاۋ جونىندەگى فەدەرالدىق قىزمەتى (روسپوترەبنادزور) قازاقستانداعى ەپيدەميولوگيالىق جاعدايعا قاتىستى رەسمي اقپارات سۇراتتى. بۇعان بۇقارالىق اقپارات قۇرالدارىندا ەلدە «اياقتان تىك تۇرعىزبايتىن ۆيرۋس» تارالىپ جاتقانى تۋرالى جاريالانىمداردىڭ شىعۋى سەبەپ بولعان، دەپ حابارلايدى "ادىرنا".
رەسەي ۆەدومستۆوسىنىڭ ءباسپاسوز قىزمەتىنىڭ حابارلاۋىنشا، قازاقستان دەنساۋلىق ساقتاۋ مينيسترلىگى رەسپۋبليكاداعى جەدەل رەسپيراتورلىق ۆيرۋستىق ينفەكتسيالار (جرۆي) مەن تۇماۋعا قاتىستى جاعدايدىڭ تۇراقتى ەكەنىن مالىمدەگەن. اۋرۋشاڭدىق دەڭگەيى ماۋسىمدىق ءوسىم كورسەتكىشتەرىنە سايكەس كەلەدى.
روسپوترەبنادزور مالىمەتىنشە، الماتى قالاسىندا اي باسىنان بەرى تىنىس الۋ جولدارى اۋرۋلارىنىڭ بەلگىلەرىمەن 14 مىڭ ادام مەديتسينالىق كومەككە جۇگىنگەن. ولاردىڭ شامامەن 2,8 مىڭى – اۋرۋحاناعا جاتقىزىلعان بالالار.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى مەديتسينالىق كومەككە جۇگىنۋشىلەر سانىنىڭ ارتۋىن ماۋسىمدىق اۋرۋشاڭدىقپەن بايلانىستىردى. سونىمەن قاتار اتا-انالاردىڭ كەيبىرى بالالارىن ەمحانالارعا اپارماي، بىردەن اۋرۋحانالاردىڭ قابىلداۋ بولىمدەرىنە جۇگىنەتىنىن ءتۇسىندىردى.
وسىلايشا، دەنساۋلىق ساقتاۋ مينيسترلىگىنىڭ مالىمەتىنشە، قازاقستاندا جرۆي مەن تۇماۋعا قاتىستى ەپيدەميولوگيالىق جاعداي تۇراقتى، ال مەديتسينالىق كومەككە جۇگىنۋشىلەر سانىنىڭ ارتۋى ماۋسىمدىق كەزەڭمەن بايلانىستى.
