قازاقستاننىڭ وسكار كوميتەتى رەجيسسەر ەلزات ەسكەندىردىڭ ء«ابىل» ءفيلمىن 2027 جىلى وتەتىن 99-شى Academy Awards («وسكار») سىيلىعىنا قازاقستان اتىنان ۇسىنۋ تۋرالى شەشىم قابىلدادى. كارتينا Best International Feature Film («ۇزدىك حالىقارالىق تولىقمەتراجدى فيلم») ساناتىندا ەل نامىسىن قورعايدى.
قازاقستاننىڭ وسكار كوميتەتى ەلىمىزدىڭ ءتورت كاسىبي قوعامدىق ۇيىمىنىڭ – قازاقستان كينوگەرلەر وداعىنىڭ، ۇلتتىق كينو ونەرى جانە عىلىمدارى اكادەمياسىنىڭ، قازاقستان كينەماتوگرافيستەر ليگاسىنىڭ جانە قازاقستان كينوسىنشىلار قاۋىمداستىعىنىڭ وكىلدەرىنەن قۇرالعان. كوميتەت شەشىمى بايقاۋعا ءوتىنىم بەرگەن فيلمدەردى قاراۋ قورىتىندىسى بويىنشا قابىلداندى.
ء«ابىل» ءفيلمىنىڭ وقيعاسى 1993 جىلى، كەڭەس وداعى ىدىراعاننان كەيىن قازاقستاندا ءجۇرىپ جاتقان الەۋمەتتىك جانە ەكونوميكالىق وزگەرىستەر كەزەڭىندە ءوربيدى. باستى كەيىپكەر ءابىل – بۇكىل عۇمىرىن كولحوزدا ەڭبەك ەتكەن شوپان. شارۋاشىلىقتىڭ تاراتىلىپ، جەكەشەلەندىرۋ ۇدەرىسىنىڭ باستالۋى ونىڭ قالىپتاسقان ءومىر سالتىن تۇبەگەيلى وزگەرتەدى.
جىلدار بويعى ەڭبەگىنىڭ وتەۋى رەتىندە وزىنە تيەسىلى ۇلەسىن الۋعا ۇمىتتەنگەن ءابىل جاڭا قوعامدىق شىندىقپەن بەتپە-بەت كەلەدى. ول وزگەرگەن زامان جاعدايىندا ءوز قۇقىعى مەن ادامدىق قادىر-قاسيەتىن قورعاۋعا ءماجبۇر بولادى.
فيلم قاراپايىم ادامنىڭ تاعدىرى ارقىلى قازاقستان تاريحىنداعى كۇردەلى كەزەڭدەردىڭ ءبىرىن – كەڭەستىك جۇيەنىڭ ىدىراپ، جاڭا ەكونوميكالىق جانە قوعامدىق قاتىناستار قالىپتاسقان ۋاقىتتى كورسەتەدى. ءابىلدىڭ وقيعاسى ادىلەت، ادامدىق قادىر-قاسيەت، وتباسى جانە ومىرلىك تاڭداۋ تاقىرىپتارىن قوزعايدى.
فيلمدەگى باستى ءرولدى اكتەر ەرلان تولەۋتاي سومداعان. ستسەناري اۆتورى ءارى قويۋشى رەجيسسەر – ەلزات ەسكەندىر. قويۋشى وپەراتورى – پولشالىق كينووپەراتور يولانتا دىلەۆسكا.
قازاقستان وسكار كوميتەتىنىڭ توراعاسى، رەجيسسەر دانيار سالاماتتىڭ ايتۋىنشا، ء«ابىل» كوركەمدىك شەشىمى مەن شىنايىلىعىمەن ەرەكشەلەنەدى. ونىڭ پىكىرىنشە، فيلم قازاقستان كورەرمەندەرىنىڭ ىقىلاسىنا يە بولۋمەن قاتار، حالىقارالىق كينوفەستيۆالدەردە دە ءوز دەڭگەيىن ءتۇرلى جۇلدەلەرمەن دالەلدەگەن.
ء«ابىلدىڭ» حالىقارالىق فەستيۆالدەردەگى جولى دا ناتيجەلى بولدى. ءفيلمنىڭ الەمدىك پرەمەراسى Busan International Film Festival فەستيۆالىندە ءوتتى. كەيىن كارتينا ازيا مەن ەۋروپانىڭ بىرقاتار حالىقارالىق كينوفەستيۆالدەرىنە قاتىسىپ، بىرنەشە ماراپاتقا يە بولدى.
فرانتسياداعى Vesoul International Film Festival of Asian Cinemas فەستيۆالىندە فيلم Grand Jury Award, Critics’ Jury Prize جانە NETPAC Jury Prize اتتى ءۇش جۇلدەنى يەلەندى. ەرلان تولەۋتاي Bishkek International Film Festival جانە Silk Road International Film Festival فەستيۆالدەرىندە ۇزدىك ەر ادام ءرولى اتالىمى بويىنشا ماراپاتتالدى. سونىمەن قاتار ء«ابىل» دانانگ پەن داككادا وتكەن حالىقارالىق كينوفەستيۆالدەردە دە جۇلدەگە يە بولدى.
قازاقستان وسكار كوميتەتىنىڭ مۇشەسى، كينوتانۋشى دانا امىربەك ءفيلمنىڭ اكتەرلىك جانە ۆيزۋالدىق شەشىمدەرىنە جوعارى باعا بەردى. ونىڭ ايتۋىنشا، ەرلان تولەۋتاي كەيىپكەردىڭ ىشكى كۇيىن اسىرەلەۋسىز ءارى تابيعي جەتكىزسە، يولانتا دىلەۆسكانىڭ وپەراتورلىق جۇمىسى ءفيلمنىڭ بايىپتى رەجيسسۋراسىمەن ۇيلەسىم تاپقان.
ء«ابىل» قازاقستان رەسپۋبليكاسى مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن شاكەن ايمانوۆ اتىنداعى «قازاقفيلم» ۇلتتىق كينوستۋدياسىنىڭ بازاسىندا تۇسىرىلگەن. فيلم 2026 جىلدىڭ ماۋسىم ايىندا قازاقستان كينوتەاترلارىندا كەڭ پروكاتقا شىقتى.
ەندى ء«ابىل» 99-شى Academy Awards سىيلىعىنىڭ Best International Feature Film ساناتىندا قازاقستان اتىنان ۇسىنىلعان فيلم رەتىندە بايقاۋدىڭ كەلەسى كەزەڭدەرىنە قاتىسادى.
ءفيلمنىڭ «وسكار» بايگەسىنىڭ كەلەسى كەزەڭدەرىنە ءوتۋى جانە نوميناتسياعا ەنۋى تۋرالى تۇپكىلىكتى شەشىمدى امەريكا كينو ونەرى جانە عىلىمدارى اكادەمياسى قولدانىستاعى ەرەجەلەرگە سايكەس قابىلدايدى.
