"قولىمدا بولسا، بيىلعى وسكاردى باسقا فيلمگە بەرەر ەدىم" - كينوسىنشى ءاسيا باقداۋلەت

2073
Adyrna.kz Telegram
قازاقتىڭ اياۋلى دا ورەلى قىزى، كينوسىنشى، ۇلىبريتانياداعى كۋين مەري ۋنيۆەرسيتەتىنىڭ PhD ستۋدەنتى ءاسيا باقداۋلەت بيىلعى جىلعى "وسكار" جۇلدەسىنە قاتىستى كاسىبي پىكىر ءبىلدىردى. سىنشىلىق ماشىعى مىعىم قازاق قىزى جۇلدە العان تۋىندىلار مەن ويىنشىلارعا باعا بەرىپ، بايقاۋدىڭ استارلى ساياساتىنا دا توقتالدى، دەپ حابارلايدى "ادىرنا" ۇلتتىق پورتالى.
كاسىبي كينوسىنشى ءاسيا باقداۋلەت بيىلعى "وسكارعا" لايىق تانىلعان ء"بارى، بارلىق جەردە، ءبىر ۋاقىتتا" دەگەن فيلمگە كەڭىنەن توقتالادى:
- قولىمدا بولسا بيىلعى وسكاردى تود ءفيلدتىڭ Tar, مارتين ماكدوناحتىڭ The Banshees of Inisherin, رۋبەن وستلۋندتىڭ Triange of Sadness-i سياقتى ءفيلمنىڭ بىرىنە بەرەر ەدىم. بىراق "وسكار" ء"بارى، بارلىق جەردە، ءبىر ۋاقىتتا" فيلمىنە بۇيىردى. وعان قوسا ۇزدىك رەجيسسەر، ۇزدىك اكتريسا، قوسالقى رولدەگى ۇزدىك اكتەر، قوسالقى رولدەگى ۇزدىك اكتريسا، ۇزدىك ستسەناري، ۇزدىك مونتاج - ەڭ ماڭىزدى نوميناتسيالاردىڭ ءبىرازىندا جۇلدەنى سىپىرىپ اكەتتى، - دەيدى جازباسىنىڭ بەتاشارىندا قازاق قىزى.
كەيىننەن جۇلدەگە ىلىككەن تۋىندىنىڭ ماڭىزىنا توقتالادى:
"يندۋستريا ءۇشىن ماڭىزى.  بۇل ارينە، «ءپارازيتتىڭ» فۋرورىمەن سالىستىرىلادى. بۇرىن گولليۆۋدتا ازيالىقتار تۋرالى وقيعالار تۇسىرىلمەيتىن، ازيالىق اكتەرلەر بەلگىلى ءبىر ستەرەوتيپتى رولدەردەن شىعا المايتىن. وسى فيلممەن "وسكار" العان يەو دا، كۋان دا قانشا رەت اق ءناسىلدى باس كەيىپكەردىڭ ازيالىق كورشىسى، دوس-قۇربىسىن ويناۋعا، نە ەكزوتيكالىق ازيالىق وقيعانى ەكرانداۋعا شاقىرىلعانى بەلگىلى. اشىق تۇردە "ازيالىقتار box office جيناي المايدى" دەيتىن. ءناسىلى ازيالىق رەجيسسەرلەر ارالاسا باستاپ ەدى، ازيالىقتار ارقىلى دا box office جيناۋعا بولاتىنى ءمالىم بولدى. سول ءۇشىن ۇلكەن راحمەت، - دەگەن توقتامعا كەلەدى.
تۋىندىنىڭ ايتار ويى مەن جەتكىزەر ماسەلەسىن بىلايشا ساراپتايدى:
"مەسسەدج ماڭىزدىلىعى.  بۇل تۋىندى ء"بارى" تۋرالى: شەكسىز عالامداعى (multiverse) اق پەن قارانىڭ ۇزدىكسىز سوعىسى، تاعدىر مەن تاڭداۋ، امەريكاداعى سالىق تولەۋدىڭ سترەسى، وتباسىىشىلىك ديناميكا مەن قارىم-قاتىناس، ءداستۇرلى ەمەس گەندەردى قابىلداۋ، ت.ب. بىراق وسىنىڭ ىشىندە نەگىزى تاقىرىپ - مەيىرىم مەن ۇمىتسىزدىكتىڭ ارپالىسى. ۆيزۋال تۇرعىدا بۇل اق شەڭبەر قورشاعان قارا نۇكتە (كوز) جانە قارا شەڭبەر قورشاعان اق نۇكتە (شوكولادتى دونات). بايقاساق، ءبۇپ-ءبۇتىن اق نە قارا بولمايدى ەكەن، دۇنيە ين مەن يان سياقتى تارتىلىس پەن تەكەتىرەستەن تۇرادى. بۇل تاقىرىپ ادامنىڭ جاندى جەرى - ەڭ جاقىن ادامدارىمەن قارىم-قاتىناسىنا نەگىزدەلىپ اشىلادى: اتا-انا مەن بالا، ەر مەن ايەل. ءبارىمىزدىڭ كىم ەكەندىگىمىزدىڭ نەگىزگى كورسەتكىشى دە سول ەمەس پە. ادامدى تۇلعا ەتىپ قالىپتاستىراتىن - اكە-شەشەسىمەن ارا-قاتىناسى. مۇندا ەۆەلين اكەسىنىڭ ريزاشىلىعىن الا الماعاندىقتان باقىتسىز، دجوي شەشەسىنەن (ەۆەلين) تۇسىنىستىك تاپپاعانى ءۇشىن تورىعۋلى. ەۆەليننىڭ وسى دۇنيەدەگى، ال دجويدىڭ شەكسىز عالامداعى قاجۋى مەن ۇمىتسىزدىگى قىز بەن اكەنىڭ/انانىڭ اراسى دۇرىس بولماعاننان. انانىڭ ماحابباتىنا جارىماعان ادام شەكسىز عالامدى حاوسقا ورايدى ەكەن".
جازباسىنىڭ شارىقتاۋ شەبىندە اۆتور فيلم جەلىسىن تالداپ، وقىرماندى كينو الەمىنە ەرەكشە ىنتىقتىرىپ اكەتەدى. شەبەرلىك پەن ساپا ماسەلەسىن ويىنشى تۇلعاسى، ىشكى لوگيكالىق بايلانىس، استارلى قۇبىلىستار ارقىلى تانۋعا تالپىنادى:
- ادامنىڭ ءار تاڭداۋى تاعدىرشەشتى دەپ قابىلداساق، كەيدە «وسى تۇستا باسقاشا شەشىم قابىلداسام قالاي بولار ەدى» دەپ ويلاۋ دا زاڭدىلىق. مۋلتيۆەرستە ەۆەلين ءوزىنىڭ باسقا تاعدىرىن كورەدى: راسىندا ۋەيموندقا كۇيەۋگە شىقپاسا باعى جانعالى تۇر ەكەن، ءوزىنىڭ ايگىلى جۇلدىز بولعانىن كورەدى. ۋەيموند تا اسا تابىستى كاسىپكەر ەكەن، بۇل وتباسى ەكەۋىنىڭ دە باعىن بايلاپتى. بىراق سۇيىسپەنشىلىكتىڭ قۇدىرەتى سول، ۋەيموند سونىڭ ءبارىن ءبىلىپ تۇرىپ، ەۆەليننىڭ جانىنداعى وسى تاعدىردى تاڭداپتى. و باستا ىنجىق كۇيەۋ دەپ ويلاعان كەيىپكەرىڭىز شەكسىز الەمدى شارلاعان قاھارمان ەكەن. فيلمدەگى ءبارىن جەڭەتىن، قالپىنا كەلتىرەتىن دە ۋەيموندتىڭ مەيىرىمى مەن سۇيىسپەنشىلىگى. ۋەيموند بەينەسى سەكسيزمنەن ارىلا الماي جۇرگەن الەم كينوسىنداعى جاڭالىق بولدى: ول ايەلدى تومەندەتپەي، ءوزىنىڭ مەنشىگى دەپ قاراماي، ونىڭ الدىنا شىقپاي-اق قاھارمان بولۋعا بولاتىنىن كورسەتتى. جاڭا عاسىردىڭ ۇزدىك ەر ادام بەينەسى وسىنداي بولسا كەرەك. ويتكەنى شىن سۇيىسپەنشىلىك پەن مەيىرىمدە ساناسۋ مەن «كىم ءبىرىنشى» دەگەن جۇرمەيدى.
ء"بارىنىڭ" "وسكار" العانىنا قۋانىشتىمىن، بىراق ەنتەرتەينمەنت پەن ەكشنعا قۇرىلعاندىقتان، ادامنىڭ جانىن توڭكەرىپ جىبەرەتىن قۇدىرەتى كەمشىندەۋ مە دەيمىن. ايتپەسە وسىنشاما كوپ تاقىرىپ ىشىندە ەڭ ماڭىزدىسىن باستان-اياق قۇرا بىلگەنى ۇلكەن شەبەرلىك، -دەگەن سىپاتتا ءوز ويىن قورىتادى ءاسيا باقداۋلەت.
"ادىرنا" ۇلتتىق پورتالى
پىكىرلەر