قازاقتىڭ ءسوز ونەرىندە وزىندىك ورنى بار اقىن، ايتىسكەر نادەجدا لۋشنيكوۆا 86 جاسقا قاراعان شاعىندا دۇنيەدەن ءوتتى. قارالى حاباردى بۇگىن، 8 قاراشادا جازۋشى، مارقۇمنىڭ اۋىلداسى يسمايلجان يمينوۆ جەتكىزدى, دەپ حابارلايدى “ادىرنا”.
“قالامىمدى قولعا الىپ، 86 جاسىندا بىرەگەي تۇلعا، كورنەكتى اقىن-يمپروۆيزاتور نادەجدا لۋشنيكوۆانىڭ ومىردەن وتكەنىن حابارلاۋعا ءماجبۇرمىن. قازاق ءسوز ونەرىن قادىر تۇتاتىن جۇرتشىلىق اراسىندا ونىڭ ەسىمى كوزى تىرىسىندە-اق اڭىزعا اينالعان ەدى.
مەن ءۇشىن نادەجدا-اپاي ەڭ الدىمەن جاقىن جان، بىرنەشە ونجىلدىق بويى ارالاسقان اياۋلى دوسىم بولدى. ءبىز كوپ ۋاقىتىمىزدى بىرگە وتكىزدىك، كۇن سايىن دەرلىك تەلەفون ارقىلى سويلەسىپ تۇردىق”، دەپ جازدى جازۋشى.
جازۋشى مارقۇمنىڭ دارىندى اقىن، اياۋلى انا، ارداقتى اجە ءارى اسىل ادام رەتىندەگى جارقىن بەينەسى جاقىندارىنىڭ، دوستارى مەن جەرلەستەرىنىڭ جادىندا ماڭگى ساقتالاتىنىن اتاپ ءوتتى.
نادەجدا اندرەەۆنا 1940 جىلى الماتى وبلىسى، شامالعان اۋىلىندا دۇنيەگە كەلگەن. بالا كەزىنەن قازاق ءتىلىن مەڭگەرىپ، قازاق فولكلورى مەن حالىق اندەرىن ءسۇيىپ وقىعان ول جاسىنان پوەزياعا قىزىعىپ، العاشقى شىعارمالارىن 1960 جىلى جاريالاعان. ايرىقشا قابىلەتى مەن ونەرىنە اسكار توقماعامبەتوۆ، مۇحتار اۋەزوۆ جانە باۋىرجان مومىشۇلى سىندى ءىرى تۇلعالار نازار اۋدارىپ، شىعارماشىلىعىن قولداعان.
1960–1980 جىلدارى نادەجدا لۋشنيكوۆا رەسپۋبليكاداعى ەڭ تانىمال اقىنداردىڭ ءبىرى بولدى. ول ليريكالىق شىعارمالارى ءۇشىن 1970 جىلى لەنيندىك كومسومول سىيلىعىنا يە بولدى. سونىمەن قاتار، 27 جىل بويى پەداگوگيكالىق قىزمەت اتقارىپ، قازاق ءتىلىن ۇيرەتىپ، جاس تالانتتاردى تاربيەلەدى.
ايتىستىڭ ءداستۇرلى ونەرىندە دە ەلەۋلى ءىز قالدىرعان نادەجدا لۋشنيكوۆا قازاقتىڭ اقىندارىمەن بىرگە ونەر سايىستارىنا قاتىسىپ، ءوز شىعارماشىلىعىمەن تىڭدارمانداردىڭ جۇرەگىنە جول تاپقان.
تىرلىكتە دۇنيە جيسام تىرباڭداۋمەن،
زامانداس جۇرەگىنەن سىر اڭدار ما ەم؟
جالعاندا ءبىر ارمانسىز بولسا مەنمىن،
زۋىلداپ قاتار ۇشقان قىراندارمەن، - دەپ جىرلاعان ەدى اقىن ءوز ولەڭدەرىنىڭ بىرىندە.
