Qazaqtyŋ söz önerınde özındık orny bar aqyn, aitysker Nadejda Luşnikova 86 jasqa qaraǧan şaǧynda dünieden öttı. Qaraly habardy bügın, 8 qaraşada jazuşy, marqūmnyŋ auyldasy İsmailjan İminov jetkızdı, dep habarlaidy “Adyrna”.
“Qalamymdy qolǧa alyp, 86 jasynda bıregei tūlǧa, körnektı aqyn-improvizator Nadejda Luşnikovanyŋ ömırden ötkenın habarlauǧa mäjbürmın. Qazaq söz önerın qadır tūtatyn jūrtşylyq arasynda onyŋ esımı közı tırısınde-aq aŋyzǧa ainalǧan edı.
Men üşın Nadejda-apai eŋ aldymen jaqyn jan, bırneşe onjyldyq boiy aralasqan aiauly dosym boldy. Bız köp uaqytymyzdy bırge ötkızdık, kün saiyn derlık telefon arqyly söilesıp tūrdyq”, dep jazdy jazuşy.
Jazuşy marqūmnyŋ daryndy aqyn, aiauly ana, ardaqty äje ärı asyl adam retındegı jarqyn beinesı jaqyndarynyŋ, dostary men jerlesterınıŋ jadynda mäŋgı saqtalatynyn atap öttı.
Nadejda Andreevna 1940 jyly Almaty oblysy, Şamalǧan auylynda düniege kelgen. Bala kezınen qazaq tılın meŋgerıp, qazaq folklory men halyq änderın süiıp oqyǧan ol jasynan poeziiaǧa qyzyǧyp, alǧaşqy şyǧarmalaryn 1960 jyly jariialaǧan. Airyqşa qabıletı men önerıne Askar Toqmaǧambetov, Mūhtar Äuezov jäne Bauyrjan Momyşūly syndy ırı tūlǧalar nazar audaryp, şyǧarmaşylyǧyn qoldaǧan.
1960–1980 jyldary Nadejda Luşnikova respublikadaǧy eŋ tanymal aqyndardyŋ bırı boldy. Ol lirikalyq şyǧarmalary üşın 1970 jyly Lenindık komsomol syilyǧyna ie boldy. Sonymen qatar, 27 jyl boiy pedagogikalyq qyzmet atqaryp, qazaq tılın üiretıp, jas talanttardy tärbieledı.
Aitystyŋ dästürlı önerınde de eleulı ız qaldyrǧan Nadejda Luşnikova qazaqtyŋ aqyndarymen bırge öner saiystaryna qatysyp, öz şyǧarmaşylyǧymen tyŋdarmandardyŋ jüregıne jol tapqan.
Tırlıkte dünie jisam tyrbaŋdaumen,
Zamandas jüregınen syr aŋdar ma em?
Jalǧanda bır armansyz bolsa menmın,
Zuyldap qatar ūşqan qyrandarmen, - dep jyrlaǧan edı aqyn öz öleŋderınıŋ bırınde.
