فوتو: Reuters
پولشا پرەمەر-ءمينيسترى دونالد تۋسك كراكوۆ قالاسىنىڭ ورتالىعىندا بەس ادامنىڭ ءومىرىن قيعان اتىستى "تەراكت" دەپ اتادى، دەپ حابارلايدى "ادىرنا" ءتىلشىسى.
قازىر پوليتسيا وقيعانىڭ سەبەپتەرى مەن ءمان-جايىن انىقتاپ جاتىر.
دونالد تۋسكتىڭ ايتۋىنشا، ىشكى ىستەر ءمينيسترى كراكوۆتاعى جاعداي تۋرالى وعان تۇراقتى تۇردە اقپارات بەرىپ وتىر. سونداي-اق پولشا ىشكى ىستەر ءمينيسترى مارچين كەرۆينسكي وقيعا ورنىنا بارا جاتىر.
اتىس 7 قاراشادا جەرگىلىكتى ۋاقىت بويىنشا ساعات 15:00 شاماسىندا كراكوۆ قالاسىنداعى باس بازار الاڭىندا بولعان. الدىن الا مالىمەتكە سايكەس، ەر ادام ءجۇرىپ بارا جاتقان كولىكتەن كوشەدەگى ادامدارعا وق اتقان.
سوڭعى مالىمەت بويىنشا، بەس ادام قازا تاۋىپ، بىرنەشە ادام جاراقات العان. زارداپ شەككەندەردىڭ اراسىندا پوليتسيا قىزمەتكەرلەرى دە بار.
كۇدىكتى ۇستاۋ كەزىندە جارالانىپ، اۋرۋحاناعا جەتكىزىلدى. قۇقىق قورعاۋ ورگاندارى شابۋىلدىڭ بارلىق ءمان-جايى مەن سەبەپتەرىن انىقتاپ جاتىر.
بۇعان دەيىن كراكوۆ ورتالىعىنداعى اتىس سالدارىنان بەس ادام قازا تاۋىپ، تاعى ون ادام جاراقات العانى حابارلانعان ەدى. ولاردىڭ اراسىندا ەكى پوليتسيا قىزمەتكەرى بولعان.
